នីការ៉ាហ្គាបានក្លាយជាប្រទេសចុងក្រោយគេបង្អស់ ដែលបានសម្រេចចិត្តកាត់ផ្តាច់ទំនាក់ទំនងការទូតជាមួយកោះតៃវ៉ាន់ ដើម្បីបង្ហាញការគាំទ្រដល់ប្រទេសចិន។ កោះតៃវ៉ាន់បាននិយាយថា ខ្លួនមានការសោកស្ដាយយ៉ាងខ្លាំង ដែលនីការ៉ាហ្គាបានបោះបង់ចំណងមិត្តភាពជាច្រើនឆ្នាំរវាងប្រទេសទាំងពីរ។
ការសម្រេចចិត្តនេះត្រូវបានកោតសរសើរយ៉ាងខ្លាំងដោយប្រទេសចិន ដែលទាមទារឱ្យប្រទេសណាមួយដែលចង់បង្កើតទំនាក់ទំនងការទូតជាមួយខ្លួនចាំបាច់ត្រូវតែកាត់ផ្តាច់ទំនាក់ទំនងដែលមានស្រាប់ជាមួយទីក្រុងតៃប៉ិ។
ទីក្រុងប៉េកាំងបានចាត់ទុកកោះតៃវ៉ាន់ជាខេត្តបំបែកខ្លួនមួយរបស់ខ្លួន ដែលត្រូវបង្រួបបង្រួមជាមួយដីគោកនៅថ្ងៃណាមួយ ប៉ុន្ដែកោះតៃវ៉ាន់បានចាត់ទុកខ្លួនឯងថាជាប្រទេសឯករាជ្យ បើទោះជាខ្លួនមិនដែលបានប្រកាសឯករាជ្យជាផ្លូវការពីដីគោកក្ដី។
បញ្ជីឈ្មោះសម្ព័ន្ធមិត្តអន្តរជាតិរបស់តៃវ៉ាន់បានធ្លាក់ចុះពី ២១ ប្រទេសមកនៅត្រឹម ១៤ ចាប់តាំងពីលោកស្រីប្រធានាធិបតី Tsai Ing-wen ឡើងកាន់តំណែងក្នុងខែឧសភា ឆ្នាំ២០១៦។
ក្រសួងការបរទេសនីការ៉ាហ្គាបាននិយាយថា៖ “ថ្ងៃនេះ នីការ៉ាហ្គាកាត់ផ្តាច់ទំនាក់ទំនងការទូតជាមួយកោះតៃវ៉ាន់ ហើយលែងមានការប្រាស្រ័យទាក់ទងឬទំនាក់ទំនងផ្លូវការតទៅទៀតហើយ ដោយនីការ៉ាហ្គាទទួលស្គាល់ថាមានចិនតែមួយគត់”។
អ្នកនាំពាក្យក្រសួងការបរទេសចិនលោក Hua Chunying បានសរសើរការសម្រេចចិត្តរបស់នីការ៉ាហ្គា ដែលជាជម្រើសត្រឹមត្រូវ ស្របតាមនិន្នាការពិភពលោក និងមានការគាំទ្រពីប្រជាជន៕
