អន្តរជាតិ៖ប្រធានាធិបតីកូរ៉េខាងត្បូង លោក Moon Jae-in មានប្រសាសន៍ថា រដ្ឋាភិបាលរបស់លោកមិនពិចារណាអំពីការធ្វើពហិការការទូតចំពោះព្រឹត្តិការណ៍កីឡាអូឡាំពិក និងប៉ារ៉ាឡាំពិកនៅទីក្រុងប៉េកាំងនោះទេ។
លោក Moon បានធ្វើការកត់សម្គាល់នៅក្នុងសន្និសីទសារព័ត៌មានមួយកាលពីថ្ងៃចន្ទ បន្ទាប់ពីបានជួបពិភាក្សាជាមួយនាយករដ្ឋមន្ត្រីអូស្ត្រាលី Scott Morrison នៅទីក្រុងកង់បេរ៉ា។លោក Moon បាននិយាយថា កូរ៉េខាងត្បូងមិនបានទទួលសំណើពីប្រទេសណាមួយផ្សេងទៀត រួមទាំងសហរដ្ឋអាមេរិកផងដែរ ដើម្បីចូលរួមក្នុងការធ្វើពហិការការទូតនោះទេ។សហរដ្ឋអាមេរិកបានប្រកាសកាលពីដើមខែនេះថា ខ្លួននឹងមិនបញ្ជូនគណៈប្រតិភូរដ្ឋាភិបាលទៅចូលរួមការប្រកួតកីឡារដូវរងាឆ្នាំ២០២២ទេ ដោយសារការព្រួយបារម្ភអំពីសិទ្ធិមនុស្សនៅក្នុងប្រទេសចិន។ប្រទេសអូស្ត្រាលី កាណាដា និងអង់គ្លេសក៏បានចូលរួមធ្វើពហិការដូចគ្នានេះដែរ។ដោយឡែកសម្រាប់សំណើរបស់ទីក្រុងសេអ៊ូលដើម្បីប្រកាសបញ្ចប់ជាផ្លូវការនៃសង្គ្រាមកូរ៉េ លោក Moon បានថ្លែងអំណរគុណដល់ប្រទេសអូស្ត្រាលីសម្រាប់ការគាំទ្ររបស់ប្រទេសនេះ។
លោក Moon បាននិយាយថា លោកជឿថាភាគីពាក់ព័ន្ធទាំងអស់ ដូចជាសហរដ្ឋអាមេរិក ចិន និងកូរ៉េខាងត្បូង និងកូរ៉េខាងជើង យល់ព្រមចំពោះសំណើនេះជាគោលការណ៍។ប៉ុន្តែលោកក៏បាននិយាយផងដែរថា ប្រទេសកូរ៉េខាងជើងបានកំណត់លក្ខខណ្ឌជាមុនដែលថា សហរដ្ឋអាមេរិកត្រូវតែលុបជាមុននូវអ្វីដែលទីក្រុងព្យុងយ៉ាងហៅថាជាគោលនយោបាយអរិភាពរបស់សហរដ្ឋអាមេរិកប្រឆាំងនឹងខ្លួន ដែលរារាំងពួកគេមិនឱ្យអង្គុយនៅតុពិភាក្សា។
លោក Moon បានសន្យាថានឹងខិតខំប្រឹងប្រែងដើម្បីចាប់ផ្តើមការចរចាឡើងវិញរវាងកូរ៉េទាំងពីររួមទាំងរវាងសហរដ្ឋអាមេរិក និងកូរ៉េខាងជើង៕
