ប្រធានការិយាល័យលិខិតឆ្លងដែនទីក្រុងកាប៊ុល ប្រទេសអាហ្វហ្គនីស្ថាន បានស្នើសុំឱ្យមានការអត់ធ្មត់ពីពលរដ្ឋរាប់ពាន់នាក់ដែលកំពុងរង់ចាំឯកសារដែលអាចឱ្យពួកគេចាកចេញពីប្រទេសបាន ខណៈដែលហ្វូងមនុស្សដ៏ច្រើននៅតែបន្តប្រមូលផ្តុំគ្នានៅខាងក្រៅការិយាល័យ ដែលបានផ្អាកប្រតិបត្តិការជាងមួយខែកន្លងមក។
នៅពេលដែលរដូវរងាបានឈានចូលមកដល់ ហើយវិបត្តិសេដ្ឋកិច្ចកាន់តែធ្ងន់ធ្ងរឡើង បន្ទាប់ពីមានការដកជំនួយពីបរទេសភ្លាមៗ ក្រោយក្រុមតាលីបង់ចូលកាន់តំណែងនៅក្នុងខែសីហា ហ្វូងមនុស្សដ៏ច្រើននៅជុំវិញមជ្ឈមណ្ឌលផ្ដល់លិខិតឆ្លងដែនដ៏ធំបំផុតនៅក្នុងប្រទេសបានលេចចេញ ដែលសបញ្ជាក់ពីបំណងប្រាថ្នាចាកចេញពីប្រទេសរបស់ពួកគេ។
ប្រធានការិយាល័យលិខិតឆ្លងដែនលោក Alam Gul Haqqani បានប្រាប់ទីភ្នាក់ងារសារព័ត៌មានរ៉យទ័រក្នុងបទសម្ភាសន៍មួយកាលពីថ្ងៃអាទិត្យថា៖ “យើងបានប្រឹងប្រែងអស់ពីសមត្ថភាពដើម្បីបើកការិយាល័យឡើងវិញ ប៉ុន្តែយើងនៅតែប្រឈមមុខនឹងការខ្វះខាតឧបករណ៍មួយចំនួន”។
កាលពីខែមុន ការិយាល័យត្រូវបានបង្ខំឱ្យបិទទ្វារ បន្ទាប់ពីឧបករណ៍ដែលប្រើសម្រាប់ផលិតលិខិតឆ្លងដែនជីវមាត្របានខូច ដោយសារតែការប្រើប្រាស់ជ្រុលហួសប្រមាណ ប៉ុន្ដែតម្រូវការបានកើនឡើងជាលំដាប់។
ទោះបីជាការិយាល័យត្រូវបានបិទអស់រយៈពេលជាច្រើនសប្តាហ៍ក៏ដោយ ក៏មនុស្សរាប់រយនាក់នៅតែប្រមូលផ្តុំនៅខាងក្រៅបរិវេណកន្លែងផលិតលិខិតឆ្លងដែនដដែល។
លោក Haqqani បាននិយាយថា៖ “ខ្ញុំប្រាកដណាស់ថា ការិយាល័យនឹងចាប់ផ្តើមឡើងវិញ ហើយយើងនឹងបំពេញគ្រប់ការស្នើសុំទាំងអស់។ ខ្ញុំធានាដល់ប្រជាជាតិថា គ្មាននរណាម្នាក់នឹងចាកចេញពីការិយាល័យយើងជាមួយភាពអាក់អន់ស្រពន់ចិត្តឡើយ”។
លោកបានបន្ដថា ការិយាល័យលិខិតឆ្លងដែនខេត្តមួយចំនួននៅតែបើក ហើយមន្ត្រីក្នុងទីក្រុងកាប៊ុលកំពុងដំណើរការលិខិតឆ្លងដែនពីការិយាល័យទាំងនេះពី២ពាន់ទៅ៣ពាន់ក្បាលក្នុងមួយថ្ងៃ ប៉ុន្តែវានៅតែមិនទាន់ច្បាស់ថានៅពេលណាដែលការិយាល័យទីក្រុងកាប៊ុលនឹងបើកឡើងវិញឡើយ៕
