ប៉ុន្មានខែបន្ទាប់ពីរដ្ឋបាលរបស់លោកប្រធានាធិបតីសហរដ្ឋអាមេរិក ចូ បៃឌិន បានដកកងទ័ពអាមេរិកចុងក្រោយចេញពីប្រទេសអាហ្វហ្គានីស្ថាន ដែលជាផ្នែកមួយនៃការសន្យារបស់លោកក្នុងការបញ្ចប់ “សង្គ្រាមដ៏យូរអង្វែង” របស់ប្រទេស សភាសហរដ្ឋអាមេរិកបានអនុម័តថវិកាការពារជាតិចំនួន ៧៧៧.៧ ពាន់លានដុល្លារ ដែលកើនឡើង ៥% បើធៀបនឹងឆ្នាំមុន។ នេះបើយោងតាមការចេញផ្សាយរបស់កាសែត Al Jazeera។
បន្ទាប់ពីឆ្លងកាត់សភាជាន់ទាបកាលពីសប្ដាហ៍មុន ព្រឹទ្ធសភាបានបោះឆ្នោតអនុម័តច្បាប់ថវិកានេះ ក្រោមការគាំទ្រដ៏ច្រើនលើសលប់កាលពីថ្ងៃពុធ ដែលក្នុងការបោះឆ្នោត ច្បាប់នេះទទួលសម្លេងគាំទ្រ ៨៩ សម្លេង និងមិនគាំទ្រ ១០ សម្លេង។
ខណៈពេលដែលវិធានការនេះត្រូវបានស្វាគមន៍ដោយសមាជិកនាំមុខទាំងពីរបក្សគឺគណបក្សប្រជាធិបតេយ្យនិងសាធារណរដ្ឋ សមាជិកសភានិងក្រុមអ្នកតស៊ូមតិកំពុងចោទសួរអំពីកញ្ចប់ថវិកាដ៏ធំសម្បើមនេះ ហើយរិះគន់អ្នកបង្កើតគោលនយោបាយថា ព្យាយាមបង្កើនការប្រកួតប្រជែងកាន់តែខ្លាំងជាមួយប្រទេសចិន។
លោក Stephen Miles នាយកប្រតិបត្តិនៃអង្គការ Win Without War ដែលជាក្រុមតស៊ូមតិ និងមានមូលដ្ឋាននៅទីក្រុង Washington, DC បាននិយាយថា៖ “សម្រាប់រយៈពេល ២០ ឆ្នាំចុងក្រោយនេះ យើងបានលឺថាការគំរាមកំហែងរបស់ភេរវករបានផ្តល់ភាពត្រឹមត្រូវដល់ការចំណាយថវិកាខ្ពស់ដែលមិនធ្លាប់មានសម្រាប់មន្ទីរបញ្ចកោណ”។
លោក Miles បានប្រាប់កាសែត Al Jazeera ថា៖ “នៅពេលដែលសង្រ្គាមនៅក្នុងប្រទេសអាហ្វហ្គានីស្ថានបានបញ្ចប់ ហើយការយកចិត្តទុកដាក់បានផ្លាស់ប្តូរទៅរកប្រទេសចិនវិញ ឥឡូវនេះយើងកំពុងលឺថាការគំរាមកំហែងពីចិនបានផ្តល់ភាពត្រឹមត្រូវដល់ការចំណាយវិញម្ដង”។
គួរបញ្ជាក់ផងដែរថា ទំនាក់ទំនងរវាងទីក្រុងប៉េកាំងនិងទីក្រុងវ៉ាស៊ីនតោនមានភាពល្អក់កករ ដោយសារមានភាពតានតឹងជាច្រើនក្នុងប៉ុន្មានឆ្នាំថ្មីៗនេះ រួមទាំងសង្រ្គាមពាណិជ្ជកម្មអំឡុងពេលលោក ដូណាល់ ត្រាំ កាន់តំណែងជាប្រធានាធិបតី និងការជំរុញបន្តរបស់សហរដ្ឋអាមេរិកប្រឆាំងនឹងការកើនឡើងនៃឥទ្ធិពលរបស់ចិននៅក្នុងតំបន់ឥណ្ឌូ-ប៉ាស៊ីហ្វិក៕
