ប្រទេសតួកគីកំពុងដំឡើងប្រាក់ឈ្នួលអប្បបរមារបស់ខ្លួនចំនួន ៥០ ភាគរយដោយចាប់ផ្តើមនៅឆ្នាំក្រោយ ខណៈប្រជាជនក្នុងប្រទេសនេះកំពុងតែប្រឈមមុខជាមួយនឹងការកើនឡើងនៃអតិផរណានិងប្រាក់លីរ៉ាដែលកំពុងធ្លាក់ចុះ។
លោកប្រធានាធិបតី Recep Tayyip Erdogan បានធ្វើសេចក្តីប្រកាសកាលពីថ្ងៃព្រហស្បតិ៍ក្នុងអំឡុងពេលសន្និសីទសារព័ត៌មានតាមទូរទស្សន៍ដោយនិយាយថា ការផ្លាស់ប្តូរគោលនយោបាយនឹងផ្តល់នូវការដំឡើងប្រាក់ឈ្នួលអប្បបរមាខ្ពស់បំផុតក្នុងរយៈពេល ៥០ ឆ្នាំ។
ការដំឡើងនេះនឹងជំរុញឱ្យប្រាក់ឈ្នួលអប្បបរមារបស់ប្រទេសតួកគីកើនពី ២.៨២៦ លីរ៉ា (១៨២ ដុល្លារ) ក្នុងមួយខែដល់ ៤.២៥០ លីរ៉ា (២៧៥ ដុល្លារ) ហើយនឹងគ្របដណ្ដប់លើកម្មករប្រហែល ៦ លាននាក់ដោយផ្ទាល់។
លោក Erdogan បានថ្លែងថា៖ “យើងប្តេជ្ញាចិត្តដើម្បីបញ្ចប់ភាពមិនប្រាកដប្រជា ដែលបានកើតឡើងជាមួយនឹងការប្រែប្រួលនៃអត្រាប្តូរប្រាក់នាពេលថ្មីៗនេះនិងការកើនឡើងនៃតម្លៃហួសហេតុ ឱ្យបានឆាប់តាមដែលអាចធ្វើទៅបាន។ យើងនឹងកំណត់អនាគតរបស់ជាតិនេះរួមជាមួយបុរសស្ត្រីទាំងក្មេងទាំងចាស់ កម្មករ និងនិយោជក”។
លោក Erdogan ក៏បានបញ្ជាក់ផងដែរថា រដ្ឋាភិបាលនឹងលុបចោលពន្ធលើប្រាក់ចំណូលនិងពន្ធប្រថាប់ត្រាលើប្រាក់ឈ្នួលអប្បបរមា។
ទ្រព្យសម្បត្តិសេដ្ឋកិច្ចរបស់ប្រទេសតួកគីត្រូវបានកើនឡើងនៅឆ្នាំនេះដោយអតិផរណាកើនឡើង និងការធ្លាក់ចុះនៃប្រាក់លីរ៉ា។ រូបិយប័ណ្ណលីរ៉ាតួកគីបានបាត់បង់តម្លៃច្រើនជាងពាក់កណ្តាលបើធៀបនឹងប្រាក់ដុល្លារសហរដ្ឋអាមេរិកចាប់តាំងពីដើមខែមករា។
អត្រាអតិផរណាផ្លូវការរបស់ប្រទេសនេះបានឡើងរហូតដល់ទៅ ២១ ភាគរយកាលពីខែមុន ដែលច្រើនជាង ៤ ដងនៃអត្រាគោលដៅ ដែលបានកំណត់ដោយធនាគារកណ្តាលរបស់ប្រទេសតួកគី ប៉ុន្តែសមាជិកនៃក្រុមប្រឆាំងរបស់ប្រទេសនេះនិងអ្នកសេដ្ឋកិច្ចមួយចំនួនបាននិយាយថា អត្រាផ្លូវការទំនងជាមិនបញ្ជាក់ពីអត្រាពិតនៃការកើនឡើងតម្លៃនោះទេ៕
