ប្រធានាធិបតីតួកគី លោក Tayyip Erdogan បាននិយាយថា លោកធ្លាប់បានបន្ទាបអត្រាអតិផរណារបស់ប្រទេសមកនៅត្រឹមប្រហែល ៤% ហើយលោកអាចធ្វើរឿងនេះបានម្ដងទៀត។ លោកបានថ្លែងដូចនេះ ចំពេលដែលអត្រាអតិផរណារបស់ប្រទេសកើនឡើងដល់ ២១% បន្ទាប់ពីការជំរុញឱ្យមានការកាត់បន្ថយអត្រាការប្រាក់យ៉ាងធ្ងន់ធ្ងរ។
លោក Erdogan បាននិយាយថា គោលនយោបាយដែលបានធ្វើឱ្យប្រាក់លីរ៉ារបស់ប្រទេសធ្លាក់ចុះ គឺជាផ្នែកនៃ “សង្គ្រាមឯករាជ្យសេដ្ឋកិច្ច” ដ៏ជោគជ័យមួយ។
លោកនិយាយថា វានឹងជំរុញការនាំចេញ ការងារ ការវិនិយោគ និងកំណើន ប៉ុន្តែអ្នកសេដ្ឋកិច្ចភាគច្រើនហៅវាថា គ្មានប្រុងប្រយ័ត្ន ហើយព្យាករថាអតិផរណានឹងកើនឡើងលើសពី ៣០% នៅឆ្នាំក្រោយ។ ប្រាក់លីរ៉ាបានធ្លាក់ចុះទាបបំផុត ហើយជាមួយនឹងការកើនឡើងនៃអតិផរណាផងនោះ រូបិយប័ណ្ណនេះបានបាត់បង់ ៥៥% នៃតម្លៃ និងធ្លាក់ចុះតម្លៃ ៣៧% ក្នុងរយៈពេល ៣០ថ្ងៃចុងក្រោយ។
នៅក្នុងកិច្ចប្រជុំជាមួយយុវជនអាហ្រ្វិកកាលពីថ្ងៃសៅរ៍ ដែលត្រូវបានចាក់ផ្សាយកាលពីថ្ងៃអាទិត្យ លោក Erdogan បានរំលឹកឡើងវិញនូវទស្សនៈរបស់លោកដែលថាអត្រាការប្រាក់ធ្វើឱ្យតម្លៃកើនឡើង ដោយបន្ថែមថាអតិផរណានឹងសង្ឃឹមថានឹងធ្លាក់ចុះក្នុងពេលឆាប់ៗនេះ។
លោក Erdogan បាននិយាយថា៖ “មិនយូរមិនឆាប់ ដូចដែលយើងបានបន្ទាបអតិផរណាទាំងអស់មកត្រឹម ៤% នៅពេលខ្ញុំកាន់អំណាចកាលពីអតីត យើងនឹងបន្ថយវាម្តងទៀត។ ប៉ុន្តែខ្ញុំនឹងមិនអនុញ្ញាតឱ្យពលរដ្ឋរបស់ខ្ញុំរងផលប៉ះពាល់ដោយសារអត្រាការប្រាក់ឡើយ”។
គួររំលឹកផងដែរថា អតិផរណាប្រចាំឆ្នាំបានធ្លាក់ចុះដល់ប្រហែល ៤% ក្នុងឆ្នាំ២០១១ នៅពេលដែលលោក Erdogan កាន់តំណែងជានាយករដ្ឋមន្ត្រី។ អតិផរណាបាននិងកំពុងកើនឡើងចាប់តាំងពីឆ្នាំ២០១៧មកម្ល៉េះ ហើយនៅក្នុងខែវិច្ឆិកា អតិផរណាបានកើនឡើង ៣.៥% នៅក្នុងខែ និងកើនរហូតដល់ ២១.៣% នៅក្នុងឆ្នាំ៕
