អន្តរជាតិ៖ប៉ូលិសក្នុងប្រទេសហ្វីលីពីនបាននិយាយថាមនុស្សចំនួន៣៧៥នាក់ស្លាប់បាត់បង់ជីវិត និង៥៦នាក់ទៀតកំពុងបាត់ខ្លួនដោយសារព្យុះទីហ្វុងRai ដែលបានបោកបក់កាត់ភាគកណ្តាលនៃប្រទេសកាលពីសប្តាហ៍មុន។អាជ្ញាធរសម្រាប់គ្រោះមហន្តរាយហ្វីលីពីនបាននិយាយថា ខ្យល់បោកបក់ខ្លាំងនិងទឹកជំនន់ដែលបង្កឡើងដោយព្យុះដ៏ខ្លាំងក្លានេះបានធ្វើឱ្យផ្ទះសម្បែងជាង៣,៨០០ខ្នងខូចខាត។ចំណែកការដាច់ចរន្តអគ្គិសនីបានកើតឡើងនៅក្នុងក្រុងប្រហែល២០០នៅពេលដែលបណ្ដាញទំនាក់ទំនងត្រូវបានកាត់ផ្តាច់នៅក្នុងតំបន់មួយចំនួន ដែលរារាំងដល់ប្រតិបត្តិការស្វែងរក និងជួយសង្គ្រោះ។
រដ្ឋាភិបាលហ្វីលីពីនកំពុងបង្កើនកិច្ចខិតខំប្រឹងប្រែងជួយសង្គ្រោះរបស់ខ្លួនខណៈដែលពលរដ្ឋជិត១សែននាក់ត្រូវបានគេបង្ខំឱ្យជម្លៀសចេញពីផ្ទះសំបែង។សូមរំលឹកថានៅក្នុងឆ្នាំ ២០១៣ ព្យុះទីហ្វុងមួយបានធ្វើឱ្យមនុស្សជាង ៦,០០០ នាក់បានស្លាប់នៅលើកោះ Leyte និងនៅតំបន់ផ្សេងទៀតនៃប្រទេសហ្វីលីពីន៕
