អន្តរជាតិ៖នាយកអង្គការសុខភាពពិភពលោកកំពុងព្រមានថាមេរោគកូវីដ-១៩បំប្លែងខ្លួនថ្មី អូមីក្រុងកំពុងឆ្លងរាលដាលលឿនជាងមេរោគកូវីដ-១៩បំប្លែងខ្លួនទម្រង់ដែលតា។
នាយកអង្គការ WHO លោក Tedros Adhanom Ghebreyesus បាននិយាយទៅកាន់អ្នកសារព័ត៌មាននៅទីស្នាក់ការកណ្តាលរបស់អង្គការនាទីក្រុងហ្សឺណែវកាលពីថ្ងៃចន្ទ។ វាជាសន្និសីទសារព័ត៌មានដោយផ្ទាល់លើកដំបូងរបស់អង្គការសុខភាពពិភពលោកក្នុងរយៈពេលជិតមួយឆ្នាំកន្លះ។
លោកTedros បាននិយាយថាពេលនេះអង្គការមានភស្តុតាងជាក់លាក់ដែលបញ្ជាក់ថា អូមីក្រុង កំពុងឆ្លងរាលដាលលឿនជាងមេរោគកូវីដទម្រង់ដែលតា។
លោកបានបន្ថែមថាទោះបីជាអ្នកចាក់វ៉ាក់សាំងពេញលេញ ឬអ្នកបានជាសះស្បើយពីជំងឺកូវីដ-១៩រួចហើយក៏ដោយ ក៏ពួកគេនៅតែអាចឆ្លងមេរោគអូមីក្រុងនេះដែរ។
ក្រុមហ៊ុនឱសថPfizer និង Moderna និយាយថាការចាក់វ៉ាក់សាំងការពារមេរោគឆ្លងរបស់ក្រុមហ៊ុនពួកគេដោយប្រើបច្ចេកវិទ្យាទំនើប mRNA អាចធ្វើឱ្យវ៉ាក់សាំងមានប្រសិទ្ធភាពប្រឆាំងនឹងមេរោគបំប្លែងខ្លួន អូមីក្រុងផងដែរ។
ប្រធានក្រុមអ្នកវិទ្យាសាស្ត្ររបស់អង្គការ WHO លោកស្រី Soumya Swaminathan បាននិយាយថាសម្រាប់លោកស្រីវានឹងក្លាយជារឿងដែលឆាប់ពេកដើម្បីឈានទៅដល់ការសន្និដ្ឋានថាមានតែវ៉ាក់សាំងផលិតដោយបច្ចេកវិទ្យាmRNAប៉ុណ្ណោះដែលមានប្រសិទ្ធភាពប្រឆាំងនឹងមេរោគបំប្លែងខ្លួនអូមីក្រុង។
លោកTedros បានសំដៅទៅលើការសិក្សាមួយដែលធ្វើឡើងដោយក្រុមអ្នកវិទ្យា សាស្រ្តអង្គការWHOនៅក្នុងទីក្រុង Wuhan របស់ប្រទេសចិន ដែលមិនបានបញ្ជាក់ពីប្រភពដើមនៃមេរោគនេះ។
លោកបានកត់សម្គាល់ថា ការសិក្សានេះត្រូវបានរារាំងដោយការខ្វះតម្លាភាពនិងការចែករំលែកទិន្នន័យពីភាគីចិន៕
