រដ្ឋមន្ត្រីការបរទេសកាណាដា លោកស្រី Melanie Joly បាននិយាយកាលពីថ្ងៃចន្ទថា លោកស្រីបានប្រើប្រាស់ឧបករណ៍ធ្វើតេស្ដរហ័សរកមេរោគកូវីដ-១៩ ហើយរកឃើញថាវិជ្ជមាន ប៉ុន្ដែលទ្ធផលនេះចាំបាច់ត្រូវធ្វើតេស្តម៉ាស៊ីន PCR ដើម្បីបញ្ជាក់បន្ថែម ដូច្នេះលោកស្រីកំពុងនៅធ្វើការដាច់ដោយឡែក។ លោកស្រីរដ្ឋមន្ត្រីមិនបានផ្តល់ព័ត៌មានលម្អិតបន្ថែមទេ ហើយអ្នកនាំពាក្យរបស់លោកស្រីមិនទាន់អាចសុំការអត្ថាធិប្បាយបានភ្លាមៗផងដែរ។
លោកនាយករដ្ឋមន្រ្តី Justin Trudeau បាននិយាយកាលពីថ្ងៃសុក្រថា ការកើនឡើងនៃករណីឆ្លងអូមីក្រុងគឺ “គួរឱ្យខ្លាច” ខណៈពេលដែលមន្ត្រីសុខាភិបាលកំពូលម្នាក់បានលើកឡើងថា ប្រព័ន្ធថែទាំសុខភាពអាចនឹងរងសម្ពាធធ្ងន់ធ្ងរក្នុងពេលឆាប់ៗនេះ។
ខេត្តកេបិច ដែលមានប្រជាជនច្រើនជាងគេលំដាប់ទីពីររបស់ប្រទេសកាណាដា បានបញ្ជាឱ្យបិទបារ កន្លែងហាត់ប្រាណ និងកាស៊ីណូនៅថ្ងៃចន្ទ ហើយបានបញ្ជាឱ្យមនុស្សធ្វើការតែពីផ្ទះប៉ុណ្ណោះ។
រដ្ឋមន្ត្រីសុខាភិបាលកេបិច លោក Christian Dube បាននិយាយថា ខេត្តនេះមានករណីឆ្លងថ្មីចំនួន ៤.៥០០ ករណីក្នុងមួយថ្ងៃ ហើយអាចឈានដល់ការចម្លងខ្លាំងជាងនេះនៅពេលខាងមុខ។
លោករដ្ឋមន្ត្រីសុខាភិបាលបានជំរុញឱ្យពលរដ្ឋក្នុងខេត្តកេបិចកាត់បន្ថយការប៉ះពាល់ជាមួយមនុស្សនៅថ្ងៃបុណ្យណូអែល និងថ្ងៃបុណ្យចូលឆ្នាំ។ វិធានការថ្មីនឹងចូលជាធរមាននៅថ្ងៃចន្ទ វេលាម៉ោង៥ល្ងាច។
លោក Dube បានប្រាប់សន្និសីទកាសែតតាមប្រព័ន្ធអនឡាញថា៖ “ស្ថានភាពគឺធ្ងន់ធ្ងរ។ ឥឡូវនេះ យើងកំពុងធ្វើសង្រ្គាមប្រឆាំងនឹងមេរោគ”។
លោក Dube បាននិយាយថា សាលារៀនភាគច្រើននឹងបិទភ្លាមៗរហូតដល់ថ្ងៃទី១០ ខែមករា ខណៈដែលភោជនីយដ្ឋាននឹងបើកចាប់ពីម៉ោង ៥ ល្ងាចដល់ម៉ោង ១០ យប់ប៉ុណ្ណោះ ហើយព្រឹត្តិការណ៍កីឡាទាំងអស់នឹងត្រូវលេងដោយគ្មានអ្នកទស្សនាផ្ទាល់៕
