សកម្មជននាំមុខអេហ្ស៊ីបត្រូវបានកាត់ទោសឱ្យជាប់ពន្ធនាគារប្រាំឆ្នាំ

លោកស្រី Mona Seif ប្អូនស្រីរបស់សកម្មជន​នាំមុខ​អេហ្ស៊ីបលោក Alaa Abdel Fattah បានប្រាប់អ្នកកាសែតថា តុលាការបានកាត់ទោសបងប្រុសរបស់នាងឱ្យជាប់ពន្ធនាគាររយៈពេលប្រាំឆ្នាំ ក្រោមការចោទប្រកាន់ពីបទផ្សព្វផ្សាយព័ត៌មានមិនពិត។

លោកស្រី Mona Seif បានបង្ហោះសារលើប្រព័ន្ធថ្វីតធ័រថា មេធាវីការពារសិទ្ធិមនុស្សលោក Mohammed al-Baqer និងអ្នកសរសេរប្លុកលោក Mohammed “Oxygen” Ibrahim ក៏ត្រូវបានកាត់ទោសឱ្យជាប់ពន្ធនាគាររយៈពេល ៤ ឆ្នាំផងដែរក្រោមការចោទប្រកាន់ដូចគ្នា។

អ្នកទាំងបីរូបនេះត្រូវបានឃុំខ្លួនតាំងពីខែកញ្ញា ឆ្នាំ២០១៩ នៅពេលដែលអាជ្ញាធរបានបង្ក្រាបការតវ៉ាប្រឆាំងរដ្ឋាភិបាលដ៏កម្រមួយ។ ក្រុម​សិទ្ធិ​មនុស្ស​បាន​ហៅ​ការ​ចោទ​ប្រកាន់​នេះ​ថា​ជា​រឿង​មិនសមហេតុផល ហើយ​ការ​កាត់​ទោស​នេះ​គឺក្លែងក្លាយ។

​ក្រុមសិទ្ធិមនុស្សបានចោទប្រកាន់រដ្ឋាភិបាលរបស់លោកប្រធានាធិបតី Abdul Fattah al-Sisi ថាបានគាបសង្កត់រាល់ទម្រង់នៃការប្រឆាំង ចាប់តាំងពីលោកបានដឹកនាំយោធាផ្តួលរំលំអ្នកស្នងតំណែងមុនគឺលោក Mohammed Morsi ក្នុងឆ្នាំ២០១៣។ ពួកគេនិយាយថា អ្នករិះគន់រដ្ឋាភិបាលរាប់ម៉ឺននាក់ រួមទាំងសកម្មជន និងមេធាវីសិទ្ធិមនុស្សផងដែរត្រូវបានឃាត់ខ្លួនតាមអំពើចិត្ត។

អង្គការលើកលែងទោសអន្តរជាតិបានឱ្យដឹងថា សាលក្រមកាលពីថ្ងៃចន្ទ គឺជា “ការសើចចំអកដល់ប្រព័ន្ធយុត្តិធម៌” ខណៈពេលដែលគណៈកម្មាធិការការពារអ្នកសារព័ត៌មានបានហៅវាថា “មិនអាចទទួលយកបាន”។

សូមជម្រាបផងដែរថា​ លោក Alaa Abdel Fattah អាយុ៤០ឆ្នាំ គឺជាអ្នកបង្កើតកម្មវិធីនិងជាអ្នកសរសេរប្លុក ដែលបានលេចធ្លាជាលើកដំបូងក្នុងអំឡុងពេលការបះបោរឆ្នាំ២០១១ ដែលបានបង្ខំឱ្យលោកប្រធានាធិបតី Hosni Mubarak ដែលគ្រងតំណែងដ៏យូរបំផុត ចុះពីកៅអី។

ពីរឆ្នាំក្រោយមក បន្ទាប់ពីលោក Sisi ឡើងកាន់អំណាច លោក Alaa Abdel Fattah ត្រូវបានចាប់ខ្លួនពីបទរៀបចំការតវ៉ាប្រឆាំងនឹងច្បាប់ថ្មីដែលហាមប្រាមការធ្វើបាតុកម្មដែលគ្មានការអនុញ្ញាត។ លោកត្រូវបានកាត់ទោសឱ្យជាប់ពន្ធនាគាររយៈពេល ៥ ឆ្នាំ ហើយត្រូវបានដោះលែងឱ្យនៅក្រៅឃុំក្នុងខែមីនា ឆ្នាំ២០១៩៕