អន្តរជាតិ៖ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថាប្រទេសរបស់លោកនឹងចាត់វិធានការឆ្លើយតបប្រសិនបើប្រទេសលោកខាងលិចបន្តគោលនយោបាយ ឈ្លានពានប៉ុន្តែនៅតែត្រៀមខ្លួនសម្រាប់ការចរចា។
នៅឯកិច្ចប្រជុំក្រុមប្រឹក្សានៃក្រសួងការពារជាតិរុស្ស៊ីកាលពីថ្ងៃអង្គារ,លោកពូទីនបាននិយាយថា ប្រសិនបើសហសេវិកលោកខាងលិចបន្តខ្សែបន្ទាត់ឈ្លានពាន រុស្ស៊ីនឹងចាត់វិធានការសងសឹកផ្នែកយោធាដើម្បីឆ្លើយតបយ៉ាងម៉ឺងម៉ាត់ចំពោះសកម្មភាពអរិភាព។លោកបាននិយាយថារុស្ស៊ីមានសិទ្ធិគ្រប់គ្រាន់ក្នុងការធ្វើដូច្នេះ ដើម្បីធ្វើសកម្មភាពក្នុងគោលបំណងធានាសន្តិសុខនិងអធិបតេយ្យភាពរបស់រុស្ស៊ីដោយបង្ហាញពីការព្រួយបារម្ភលើការដាក់ពង្រាយប្រព័ន្ធការពារមីស៊ីលរបស់សហរដ្ឋអាមេរិកនៅជិតព្រំដែនរុស្ស៊ី រួមទាំងនៅក្នុងប្រទេសរូម៉ានីនិងប៉ូឡូញដែរ។
ប្រធានាធិបតីរុស្ស៊ីរូបនេះបានព្រមានថា ប្រសិនបើសហរដ្ឋអាមេរិកនិងអង្គការសន្ធិសញ្ញាអាត្លង់ទិកខាងជើង(ណាតូ) ដាក់ពង្រាយកាំជ្រួចនៅអ៊ុយក្រែន ពួកគេនឹងហោះទៅដល់ទីក្រុងមូស្គូក្នុងរយៈពេលត្រឹមតែ៧ទៅ១០នាទីប៉ុណ្ណោះ ហើយប្រសិនបើវាជាអាវុធប្រភេទហាយភើសូនិកទៀតនោះវាចំណាយពេលត្រឹមតែ៥នាទីប៉ុណ្ណោះ។
សូមជម្រាបថាថ្មីៗនេះរុស្ស៊ីបានបញ្ជូនសេចក្តីព្រាងកិច្ចព្រមព្រៀងមួយទៅអង្គការណាតូនិងសេចក្តីព្រាងសន្ធិសញ្ញាមួយទៅកាន់សហរដ្ឋអាមេរិកក្នុងគោលបំណងធានាសន្តិសុខនៅអឺរ៉ុប ដើម្បីឲ្យប្រទេសលោកខាងលិចពិចារណា។
លោកពូទីនបានរំលឹកឡើងវិញថា រុស្ស៊ីមានជំហរប្រឆាំងនឹងជម្លោះប្រដាប់អាវុធនិងការបង្ហូរឈាមហើយមានបំណងចង់ដោះស្រាយបញ្ហាតាមរយៈការទូតប៉ុន្តែត្រូវតែមានការធានាផ្លូវច្បាប់ច្បាស់លាស់៕
