មន្ត្រីជាន់ខ្ពស់របស់អង្គការសុខភាពពិភពលោក (WHO) ប្រចាំទ្វីបអឺរ៉ុបបានព្រមានថា ការកើនឡើងនៃករណីអូមីក្រុងនឹងជំរុញឱ្យប្រព័ន្ធសុខាភិបាលអឺរ៉ុបឆ្ពោះទៅរកមាត់ជ្រោះ។
លោក Hans Kluge បាននិយាយថា “ព្យុះមួយទៀត” កំពុងមកដល់ ហើយរដ្ឋាភិបាលគួរតែរៀបចំត្រៀមខ្លួនសម្រាប់ការកើនឡើងនៃអ្នកជំងឹ។ លោកបានធ្វើការព្រមានដូចនេះ ចំពេលដែលប្រទេសមួយចំនួនក្នុងទ្វីបអឺរ៉ុបបានចាប់ផ្ដើមអនុវត្តវិធានការរក្សាគម្លាតសង្គមឡើងវិញ។
ប្រទេសអាល្លឺម៉ង់បានប្រកាសច្បាប់ថ្មីក្រោយបុណ្យណូអែល រួមទាំងការកំណត់ចំនួនមនុស្សក្នុងពិធីជប់លៀង។ ទន្ទឹមនឹងនេះ ប្រទេសព័រទុយហ្គាល់បានបញ្ជាឱ្យបិទបារ និងក្លឹបរាត្រីចាប់ពីថ្ងៃទី២៦ ខែធ្នូតទៅ។
នាយករដ្ឋមន្រ្តីចក្រភពអង់គ្លេសលោក បូរីស ចនសុន បានច្រានចោលការរឹតបន្តឹងថ្មីណាមួយសម្រាប់ប្រទេសអង់គ្លេសមុនថ្ងៃបុណ្យណូអែល ប៉ុន្តែស្កុតឡេន វេលស៍ និងអៀរឡង់ខាងជើងបានប្រកាសពីការរឹតត្បិតលើការប្រាស្រ័យទាក់ទងគ្នាផ្ទាល់។
គួរបញ្ជាក់ផងដែរថា វ៉ារ្យ៉ង់អូមីក្រុងត្រូវបានគេកំណត់អត្តសញ្ញាណដំបូងនៅអាហ្វ្រិកខាងត្បូងកាលពីខែមុន ប៉ុន្តែឥឡូវបានរីករាលដាលជុំវិញពិភពលោក។ អង្គការ WHO បាននិយាយថា ប្រទេសចំនួន ៣៨ ក្នុងចំណោម ៥៣ នៅទ្វីបអឺរ៉ុបបានរកឃើញមេរោគបំប្លែងខ្លួនថ្មីនេះ ហើយប្រទេសរុស្ស៊ីនិងតួកគីមានអត្រាឆ្លងអូមីក្រុងខ្ពស់ជាងបណ្ដាប្រទេសផ្សេងៗ៕
