ប្រធានាធិបតីសហរដ្ឋអាមេរិកលោក ចូ បៃឌិន បាននិយាយថា ឧបករណ៍ធ្វើតេស្តរហ័សរកកូវីដ-១៩ចំនួន៥០០លានឈុតនឹងដាក់ចែកដោយមិនគិតថ្លៃ ចំពេលមានវិធានការថ្មីដើម្បីដោះស្រាយការកើនឡើងនៃការឆ្លងមេរោគបំប្លែងថ្មីអូមីក្រុង។
លោក បៃឌិន ក៏បានប្រកាសពីការពង្រីកការធ្វើតេស្ត និងការគាំទ្រពីក្រុមយោធានៅតាមមន្ទីរពេទ្យ ប៉ុន្តែបាននិយាយថា មិនទាន់ឈានដល់វិធានការបិទខ្ទប់នៅឡើយទេ។ លោកបានមានប្រសាសន៍ថា៖ “នេះមិនមែនជាខែមីនា ឆ្នាំ២០២០ឡើយ។ យើងបានត្រៀមខ្លួនរួចរាល់។ យើងដឹងច្រើនជាងមុន”។
មេរោគបំប្លែងថ្មីអូមីក្រុងបានក្លាយជាវ៉ារ្យ៉ង់ដ៏លេចធ្លោនៅក្នុងសហរដ្ឋអាមេរិក ដែលត្រូវបានរកឃើញលើអ្នកជំងឺឆ្លងថ្មីស្មើនឹងជិតបីភាគបួន។ វាត្រូវបានគេកំណត់អត្តសញ្ញាណជាលើកដំបូងនៅអាហ្វ្រិកខាងត្បូងកាលពីខែមុន ប៉ុន្តែឥឡូវនេះបានរីករាលដាលពាសពេញពិភពលោក។
មកទល់ពេលនេះ អ្នកដែលស្លាប់ដោយសារវ៉ារ្យ៉ង់អូមីក្រុងនៅសហរដ្ឋអាមេរិកមានតែម្នាក់គត់ ដែលជាបុរសវ័យ៥០ឆ្នាំនៅរដ្ឋតិចសាស់ ហើយមានជំងឺប្រចាំកាយនិងពុំបានទទួលវ៉ាក់សាំង។ ទោះបីជា ៧៣% នៃប្រជាជនអាមេរិកពេញវ័យត្រូវបានចាក់វ៉ាក់សាំងពេញលេញប្រឆាំងនឹងមេរោគកូវីដ-១៩ក្ដី ក៏រដ្ឋបាលនៅតែមានការព្រួយបារម្ភអំពីអ្នកដែលមិនទាន់បានចាក់វ៉ាក់សាំង។
ថ្លែងកាលពីថ្ងៃអង្គារ លោក បៃឌិន បានទទូចជនជាតិអាមេរិកម្តងទៀតឱ្យការពារខ្លួន និងទទួលថ្នាំបង្ការ។ លោកបានទទួលស្គាល់ថា ជនជាតិអាមេរិកដែលទទួលថ្នាំបង្ការមួយចំនួនក៏នឹងឆ្លងដែរ ប៉ុន្តែអ្នកដែលមិនបានទទួលថ្នាំបង្ការមានហានិភ័យខ្ពស់ ដែលអាចឈឺខ្លាំងរហូតដល់ត្រូវការការថែទាំនៅមន្ទីរពេទ្យ ឬក៏អាចស្លាប់បាន៕