សហរដ្ឋអាមេរិកបានដកទណ្ឌកម្មជាផ្លូវការកាលពីថ្ងៃពុធលើការហាមឃាត់មន្ត្រីសហរដ្ឋអាមេរិកនិងអង្គការសហប្រជាជាតិពីការទាក់ទងជាមួយក្រុមតាលីបង់ ដើម្បីព្យាយាមរក្សាលំហូរជំនួយទៅកាន់ប្រទេសអាហ្វហ្គានីស្ថាន ខណៈដែលប្រទេសនេះកាន់តែធ្លាក់ជ្រៅទៅក្នុងវិបត្តិមនុស្សធម៌។
ទោះជាយ៉ាងនេះក្តី គេមិនទាន់ដឹងច្បាស់ទេថា តើការផ្លាស់ប្តូរនេះនឹងត្រួសត្រាយផ្លូវសម្រាប់ការស្នើរផ្ដល់ថវិកា៦លានដុល្លារពីអង្គការសហប្រជាជាតិដល់ក្រុមតាលីបង់លើផ្នែកសន្ដិសុខដែរយ៉ាងណានោះ។
គួរជម្រាបផងដែរថា កាសែតរ៉យទ័រ កាលពីថ្ងៃអង្គារ បានរាយការណ៍ទាំងស្រុងពីផែនការរបស់អង្គការសហប្រជាជាតិក្នុងការឧបត្ថម្ភថវិកានៅឆ្នាំក្រោយដើម្បីបើកប្រាក់បៀវត្សប្រចាំខែឱ្យមន្ត្រីក្រសួងមហាផ្ទៃរបស់ក្រុមតាលីបង់ ដែលយាមកាមស្នាក់ការរបស់អង្គការសហប្រជាជាតិ និងផ្តល់ប្រាក់ឧបត្ថម្ភលើថ្លៃអាហារប្រចាំខែដល់ពួកគេ ដែលផែនការនេះត្រូវបានចោទជាសំណួរថាតើអាចបំពានទណ្ឌកម្មរបស់សហរដ្ឋអាមេរិកដែរឬទេ។
ក្រសួងរតនាគារសហរដ្ឋអាមេរិកបានបដិសេធមិនបកស្រាយលើការស្នើសុំផ្ដល់ប្រាក់៦លានដុល្លារដោយអង្គការសហប្រជាជាតិពីក្រុមតាលីបង់ឡើយ។ សហរដ្ឋអាមេរិកបានចាត់ទុកក្រុមតាលីបង់ជាក្រុមភេរវករអស់ជាច្រើនឆ្នាំមកហើយ។ ទីក្រុងវ៉ាស៊ីនតោនបានបញ្ជាឱ្យបង្កកទ្រព្យសម្បត្តិនិងរារាំងជនជាតិអាមេរិកមិនឱ្យធ្វើប្រតិបត្តិការជាមួយក្រុមតាលីបង់ឡើយ។
កាលពីថ្ងៃពុធម្សិលមិញនេះ ក្រសួងរតនាគារធបានចេញអាជ្ញាប័ណ្ណទូទៅចំនួនបីក្នុងគោលបំណងសម្រួលលំហូរជំនួយមនុស្សធម៌ទៅកាន់ប្រទេសអាហ្វហ្គានីស្ថាន។ អាជ្ញាប័ណ្ណពីរអនុញ្ញាតឱ្យមន្ត្រីសហរដ្ឋអាមេរិក និងអង្គការអន្តរជាតិមួយចំនួន ដូចជាអង្គការសហប្រជាជាតិ ធ្វើប្រតិបត្តិការជាមួយក្រុមតាលីបង់ ឬក្រុម Haqqani Network។ អាជ្ញាប័ណ្ណទីបីផ្តល់ការការពារដល់អង្គការមិនមែនរដ្ឋាភិបាល (NGOs) ពីការដាក់ទណ្ឌកម្មរបស់សហរដ្ឋអាមេរិកលើក្រុមតាលីបង់ និងក្រុម Haqqani Network សម្រាប់ការងារលើសកម្មភាពមួយចំនួន រួមទាំងគម្រោងមនុស្សធម៌ផងដែរ។
មន្ត្រីរដ្ឋបាលជាន់ខ្ពស់របស់សហរដ្ឋអាមេរិកមួយរូបបាននិយាយថា ក្រុមតាលីបង់នឹងត្រូវចាត់វិធានការដើម្បីការពារសេដ្ឋកិច្ចរបស់ប្រទេសអាហ្វហ្គានីស្ថានពីការធ្លាក់ចុះខ្លាំងជាងនេះ៕
