អន្តរជាតិ៖ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសថា អ្នកការទូតមកពីប្រទេសរបស់គាត់និងសហរដ្ឋអាមេរិកនឹងបើកកិច្ចប្រជុំកម្រិតខ្ពស់នៅទីក្រុងហ្សឺណែវនៅដើមឆ្នាំក្រោយ ដើម្បីពិភាក្សាអំពីស្ថានភាពនៅប្រទេសអ៊ុយក្រែន។លោកពូទីនបានធ្វើសន្និសីទសារព័ត៌មានបំណាច់ឆ្នាំរបស់លោកកាលពីថ្ងៃព្រហស្បតិ៍ ដោយឆ្លើយសំណួរពីប្រព័ន្ធផ្សព្វផ្សាយក្នុងស្រុកនិងបរទេសរយៈពេលជាង៤ម៉ោង។
ទន្ទឹមនឹងភាពតានតឹងកើនឡើងជុំវិញការបង្កើនកងទ័ពដ៏ធំរបស់រុស្ស៊ីនៅតាមព្រំដែនរបស់ខ្លួនជាមួយអ៊ុយក្រែន លោក ពូទីន បានបង្ហាញការព្រួយបារម្ភយ៉ាងខ្លាំងអំពីកិច្ចខិតខំប្រឹងប្រែងរបស់សហរដ្ឋអាមេរិក និងអង្គការណាតូក្នុងការជំរុញទំនាក់ទំនងរបស់ពួកគេជាមួយប្រទេសនោះ។
មេដឹកនាំកំពូលរុស្ស៊ីរូបនេះបានចោទជាសំនួរថា៖«តើយើងកំពុងដាំកាំជ្រួចនៅជិតព្រំដែនសហរដ្ឋអាមេរិកមែនទេ? តែសហរដ្ឋអាមេរិកវិញទេដែលបាននាំយកកាំជ្រួចរបស់ខ្លួនមកកាន់មាត់ទ្វាររបស់យើង»។រុស្ស៊ីបាននិងកំពុងទាមទារការធានាជាលាយលក្ខណ៍អក្សរថា អង្គការណាតូ នឹងបញ្ឈប់ការពង្រីកខ្លួន និងបដិសេធសមាជិកភាពរបស់អ៊ុយក្រែន។
លោក ពូទីន បាននិយាយថា រុស្ស៊ីត្រូវគិតអំពីការធានាសន្តិសុខរបស់ខ្លួន។លោកបាននិយាយថា”បាល់គឺនៅក្នុងទីលានរបស់ពួកគេ”ដែលបង្ហាញថារុស្ស៊ីមានបំណងស្វែងរកសម្បទានពីសហរដ្ឋអាមេរិកតាមរយៈការចរចា៕
