អន្តរជាតិ៖រដ្ឋមន្ត្រីក្រសួងសុខាភិបាល Jean-Jacques Mbungani បាននិយាយថាសាធារណរដ្ឋប្រជាធិបតេយ្យកុងហ្គោ(DRC)កាលពីថ្ងៃព្រហស្បតិ៍បានប្រកាសបញ្ចប់ការផ្ទុះឡើងនៃជំងឺរលាកស្រោមខួរនៅក្នុងខេត្ត Tshopo ភាគឦសានប្រទេស។
រដ្ឋមន្ត្រីសុខាភិបាលរូបនេះបាននិយាយថា ការប្រកាសនៅដើមខែកញ្ញាឆ្នាំ២០២១អំពីការផ្ទុះនូវជំងឺរលាកស្រោមខួរបានសម្លាប់មនុស្សចំនួន២០៥នាក់ក្នុងចំណោមករណីដែលបានរកឃើញសរុបចំនួន២,៦៦២ករណី។បើតាមសម្ដីលោក Mbungani, ការប្រកាសខាងលើនេះបានធ្វើឡើងបន្ទាប់ពីអាជ្ញាធរសុខាភិបាលកុងហ្គោបានកត់សម្គាល់អំពីការធ្លាក់ចុះក្រោមកម្រិតប្រកាសអាសន្នរយៈពេលពីរសប្តាហ៍ជាប់ៗគ្នានៃការឆ្លងមេរោគនៅក្នុងខេត្តTshopo។
ជំងឺរលាកស្រោមខួរអាចឆ្លងបានពីមនុស្សម្នាក់ទៅមនុស្សម្នាក់ទៀតតាមរយៈដំណក់ទឹកនៃផ្លូវដង្ហើមឬបំពង់កពីមនុស្សដែលឆ្លងមេរោគ។អ្នកជំងឺភាគច្រើនជាកុមារនិងមនុស្សមានវ័យជំទង់។
សូមរំលឹកថាកាលពីឆ្នាំ២០០៩ជំងឺរលាកស្រោមខួរបានផ្ទុះឡើងម្ដងរួចហើយនៅក្នុងខេត្ត Kisanganiប្រទេសកុងហ្គោដោយមានមនុស្ស២១៤នាក់បានឆ្លងនិងបណ្តាលឱ្យមនុស្ស១៥នាក់បានស្លាប់បាត់បង់ជីវិត៕
