អន្តរជាតិ៖ពលរដ្ឋរាប់ពាន់នាក់ត្រូវបានបង្ខំឱ្យភៀសខ្លួនចេញពីផ្ទះសំបែងរបស់ពួកគេនៅភាគឦសានប្រទេសប្រេស៊ីល ខណៈដែលភ្លៀងធ្លាក់ខ្លាំងជាច្រើនសប្តាហ៍បណ្តាលឱ្យមានទឹកជំនន់។
ការសែតជប៉ុនNHKបានរាយការណ៍ថា ទំនប់ទឹកចំនួនពីរនៅរដ្ឋBahiaបានបាក់រលំកាលពីចុងសប្តាហ៍ ហើយនៅពេលនេះកម្ពស់ទឹកទន្លេកំពុងហក់ឡើងខ្ពស់ដែលគំរាមកំហែងដល់ការបំផ្លិចបំផ្លាញបន្ថែមទៀត។
រូបភាពថតពីលើអាកាសបានបង្ហាញអំពីសភាពផ្លូវ និងស្ពានដែលលិចទឹក ហើយមនុស្សជម្លៀសខ្លួនតាមទូក។
មន្ត្រីក្នុងតំបន់បាននិយាយថា ក្នុងរយៈពេលប៉ុន្មានសប្តាហ៍កន្លងមកនេះ យ៉ាងហោចណាស់មនុស្ស ១៧ នាក់បានស្លាប់នៅក្នុងតំបន់ទឹកជំនន់។
អាជ្ញាធរខេត្តBahiaបាននិយាយថា អ្នកស្រុករាប់ពាន់នាក់ត្រូវបានបង្ខំឱ្យជម្លៀសចេញ ហើយមនុស្សសរុបប្រមាណ៤សែននាក់បានរងផលប៉ះពាល់។
អ្នកស្រុកម្នាក់បានរៀបរាប់ពីស្ថានភាពនេះថាសោកសៅយ៉ាងខ្លាំង ដោយនិយាយថាគាត់មិនដែលជួបរឿងនេះពីមុនមកទេ។
អាជ្ញាធរក្នុងតំបន់បានបន្តថាពួកគេកំពុងបញ្ជូនស្បៀងអាហារ សម្លៀកបំពាក់ និងការផ្គត់ផ្គង់ជំនួយផ្សេងទៀតហើយកំពុងត្រៀមសម្រាប់ការខូចខាតដោយទឹកជំនន់បន្ថែមទៀត៕
