ប្រធានាធិបតីវេណេស៊ុយអេឡា លោក Nicolas Maduro បាននិយាយកាលពីថ្ងៃអាទិត្យថា លោកនឹងទៅបំពេញទស្សនកិច្ចនៅអ៊ីរ៉ង់ក្នុងពេលឆាប់ៗនេះ ដើម្បីសម្រេចកិច្ចព្រមព្រៀងថ្មីស្តីពីកិច្ចសហប្រតិបត្តិការជាមួយប្រទេសមជ្ឈិមបូព៌ា ដែលបានក្លាយជាសម្ព័ន្ធមិត្តកំពូលរបស់វេណេហ្ស៊ុយអេឡា ក្នុងការជំរុញទិន្នផលប្រេងចំពេលមានទណ្ឌកម្មរបស់សហរដ្ឋអាមេរិក។
វ៉េណេស៊ុយអេឡា និងអ៊ីរ៉ង់បានពង្រឹងទំនាក់ទំនងរបស់ប្រទេសទាំងពីរចាប់តាំងពីឆ្នាំមុន។
រដ្ឋាភិបាលរបស់លោក Maduro បានទទួលឧបករណ៍សំខាន់ៗសម្រាប់ឧស្សាហកម្មប្រេងរបស់ខ្លួនពីប្រទេសអ៊ីរ៉ង់ ដែលជាថ្នូរនឹងការទទួលបានប្រេងឆៅ និងធនធានចម្បងផ្សេងទៀតពីប្រទេសនៅតំបន់អាមេរិកខាងត្បូង។ អ៊ីរ៉ង់គឺជាដៃគូដ៏សំខាន់លើផ្នែកផលិតកម្មប្រេងរបស់វេណេហ្ស៊ុយអេឡាក្នុងឆ្នាំ២០២១។
លោក Maduro បានមានប្រសាសន៍ក្នុងបទសម្ភាសន៍ជាមួយអ្នកផ្សាយព័ត៌មានផ្កាយរណប Al Mayadeen ជាភាសាអេស្ប៉ាញថា៖ “ខ្ញុំនឹងទៅទីក្រុងតេអ៊ីរ៉ង់ក្នុងពេលឆាប់ៗនេះ សម្រាប់ដំណើរទស្សនកិច្ចដែលលោកប្រធានាធិបតី Ebrahim Raisi បានអញ្ជើញខ្ញុំ ដូច្នេះយើងជួបផ្ទាល់ ដើម្បីធ្វើការសន្ទនា និងចុះហត្ថលេខាលើកិច្ចព្រមព្រៀងថ្មី … និងបង្កើនល្បឿនដំណើរការនៃកិច្ចសហប្រតិបត្តិការ”។
លោក Maduro បានបន្ដថា លោកបានសន្ទនាតាមទូរស័ព្ទចំនួនពីរលើកជាមួយប្រធានាធិបតីអ៊ីរ៉ង់ ដោយបន្ថែមថាប្រមុខដឹកនាំទាំងពីរប្រទេសបានយល់ព្រមធ្វើការលើផែនការថ្មី ប៉ុន្ដែមិនបានផ្តល់ព័ត៌មានលម្អិតឡើយ។ លោកក៏មិនបានផ្តល់កាលបរិច្ឆេទសម្រាប់ដំណើរទស្សនកិច្ចនេះដែរ។
លោក Maduro បានបន្ថែមថា នៅឆ្នាំ២០២២ វេណេហ្ស៊ុយអេឡាក៏នឹងសម្លឹងរកវិធីបង្កើតកិច្ចសហប្រតិបត្តិការឡើងវិញជាមួយបណ្តាប្រទេសអារ៉ាប់ ដោយនិយាយថា៖ “ក្នុងពិភពអារ៉ាប់ ពួកគេស្រឡាញ់យើង ខ្ញុំដឹងថារដ្ឋាភិបាល និងប្រជាជនអារ៉ាប់ស្រឡាញ់ប្រទេសវេណេហ្ស៊ុយអេឡា”។
គួរបញ្ជាក់ផងដែរថា ការរឹតបន្តឹងទណ្ឌកម្មរបស់សហរដ្ឋអាមេរិកចាប់តាំងពីឆ្នាំ២០១៩ បានប៉ះពាល់ដល់សមត្ថភាពរបស់វេណេហ្ស៊ុយអេឡាក្នុងការលក់ប្រេងឆៅ និងនាំចូលប្រេងឥន្ធនៈ ដែលបានធ្វើឱ្យកង្វះខាតប្រេងសាំងនៅទូទាំងប្រទេសកាន់តែធ្ងន់ធ្ងរ៕
