សារព័ត៌មានក្នុងស្រុក Nikkei business daily បានចេញផ្សាយកាលពីថ្ងៃចន្ទថា ជិតពីរភាគបីនៃអ្នកបោះឆ្នោតជប៉ុនគាំទ្ររដ្ឋាភិបាលរបស់លោកនាយករដ្ឋមន្ត្រី Fumio Kishida ដោយសាធារណជនស្វាគមន៍ ចំពោះវិធានការប្រឆាំងនឹងមេរោគកូវីដ-១៩របស់លោក រួមទាំងការបិទព្រំដែនបណ្តោះអាសន្នចំពោះអ្នកដំណើរមកពីបរទេស។
កាសែតនេះបាននិយាយថា ការគាំទ្រសម្រាប់គណៈរដ្ឋមន្ត្រីរបស់លោក Kishida បានកើនឡើងដល់ ៦៥% ដែលជាការកើនឡើង ៤ ភាគរយបើធៀបនឹងការស្ទង់មតិមុន កាលពីមួយខែកន្លងទៅ។
នៅក្នុងការស្ទង់មតិចុងក្រោយបង្អស់ដែលបានធ្វើឡើងពីថ្ងៃសុក្រដល់ថ្ងៃអាទិត្យ ៦១% នៃអ្នកដែលបានស្ទង់មតិបានវាយតម្លៃជាវិជ្ជមាននូវជំហានប្រឆាំងមេរោគរបស់លោក Kishida ដែលជាតួលេខខ្ពស់បំផុតចាប់តាំងពីកាសែត Nikkei បានចាប់ផ្តើមសួរមតិរបស់សាធារណជនលើការឆ្លើយតបនឹងមេរោគឆ្លងរបស់រដ្ឋាភិបាលក្នុងខែកុម្ភៈ ឆ្នាំ២០២០។
ចំពេលមានការលេចចេញជាសកលនៃវ៉ារ្យ៉ង់អូមីក្រុង ដែលមានអត្រាចម្លងខ្ពស់ លោក Kishida កាលពីចុងខែវិច្ឆិកាបានប្រកាសថា ប្រទេសជប៉ុនកំពុងរារាំងមិនឱ្យជនបរទេសចូលប្រហែលមួយខែ។ កាលពីសប្តាហ៍មុន លោកបានបន្ដវិធានការនេះរហូតដល់ថ្ងៃឈប់សម្រាកចូលឆ្នាំថ្មី។
លោក Kishida បានចូលកាន់តំណែងក្នុងខែតុលា ដោយជំនួសលោក Yoshihide Suga ដែលបានកាន់តំណែងមួយឆ្នាំ ប៉ុន្ដែប្រជាប្រិយភាពរបស់លោកអតីតនាយករដ្ឋមន្ត្រីបានធ្លាក់ចុះ នៅពេលប្រទេសជប៉ុនមានការកើនឡើងករណីឆ្លងមេរោគកូវីដ-១៩។
ប្រទេសជប៉ុនបានរកឃើញករណីឆ្លងមេរោគថ្មីប្រចាំថ្ងៃជាច្រើនរយនាក់ងរយៈពេលប៉ុន្មានសប្តាហ៍ថ្មីៗនេះ ដែលបានធ្លាក់ចុះយ៉ាងខ្លាំងពីការឆ្លងប្រចាំថ្ងៃជាង ២ម៉ឺននាក់នៅក្នុងកម្រិតខ្ពស់បំផុតក្នុងខែសីហា៕
