អន្តរជាតិ៖ប្រភពបាននិយាយថាការរៀបចំកំពុងដំណើរការសម្រាប់ប្រមុខការពារជាតិជប៉ុន សហរដ្ឋអាមេរិក និងកូរ៉េខាងត្បូង ដើម្បីជួបពិភាក្សាគ្នាស្ដីពីកូរ៉េខាងជើងនៅកោះហាវ៉ៃនាពាក់កណ្តាលខែមករាខាងមុខនេះ។
កិច្ចប្រជុំនេះនឹងចូលរួមដោយរដ្ឋមន្ត្រីការពារជាតិជប៉ុន លោក Kishi Nobuo រដ្ឋមន្ត្រីការពារជាតិអាមេរិកលោក Lloyd Austin និងរដ្ឋមន្ត្រីការពារជាតិកូរ៉េខាងត្បូង លោក Suh Wook ។
មន្រ្តីជាន់ខ្ពស់ទាំងបីរូបខាងលើត្រូវបានគេរំពឹងថានឹងពិភាក្សាអំពីរបៀបដើម្បីសម្រេចបាននូវការរំសាយអាវុធនុយក្លេអ៊ែររបស់កូរ៉េខាងជើង និងធ្វើឱ្យប្រទេសនេះបញ្ឈប់ការបាញ់សាកល្បងមីស៊ីលផ្លោងដែលបំពានលើដំណោះស្រាយរបស់អង្គការសហប្រជាជាតិ។
តែយ៉ាងណាក៏ដោយ,ប្រភពបាននិយាយថាពួកគេនៅមិនទាន់សម្រេចនៅឡើយទេថាតើការពិភាក្សានោះនឹងត្រូវធ្វើឡើងដោយផ្ទាល់ឬតាមប្រព័ន្ធអ៊ីធើណែត ចំពេលមានការរីករាលដាលនៃមេរោគកូវីដ-១៩បំប្លែងខ្លួនថ្មីអូមីក្រុង។
ប្រទេសជប៉ុន និងសហរដ្ឋអាមេរិកបានរៀបចំកិច្ចប្រជុំរបស់ប្រមុខការបរទេស និងការពារជាតិរបស់ពួកគេនៅថ្ងៃទី៧ខែមករានៅទីក្រុងវ៉ាស៊ីនតោន។ ប៉ុន្តែឥឡូវនេះពួកគេត្រូវបានគេរំពឹងថានឹងផ្លាស់ប្តូរពីការពិភាក្សាទម្រង់”ពីរបូកពីរ”ទៅជាកិច្ចប្រជុំតាមអនឡាញវិញដោយសារតែការគំរាមកំហែងរបស់អូមីក្រុង។
សូមរំលឹកដែរថាលោកAustinនិងលោក Suh បានជួបគ្នានៅដើមខែនេះក្នុងទីក្រុងសេអ៊ូលដើម្បីពិភាក្សាអំពីការឆ្លើយតបដែលអាចធ្វើទៅបានចំពោះកម្មវិធីនុយក្លេអ៊ែរ និងកាំជ្រួចរបស់កូរ៉េខាងជើង។អ្នកទាំងពីរបានព្រមព្រៀងគ្នាថា កិច្ចសហប្រតិបត្តិការសន្តិសុខត្រីភាគីក្នុងចំណោមកូរ៉េខាងត្បូង អាមេរិក និងជប៉ុននៅតែសំខាន់ចំពោះស្ថិរភាពក្នុងតំបន់៕
