មហាសេដ្ឋីសហរដ្ឋអាមេរិក លោក Elon Musk កំពុងប្រឈមមុខនឹងការរិះគន់លើប្រព័ន្ធផ្សព្វផ្សាយសង្គម បន្ទាប់ពីប្រទេសចិនបានត្អូញត្អែរថា ស្ថានីយអវកាសរបស់ខ្លួនត្រូវបានបង្ខំឱ្យហោះជៀស ដើម្បីបង្ការការប៉ះទង្គិចជាមួយផ្កាយរណបដែលបានបង្ហោះដោយគម្រោងសេវាអ៊ីនធឺណិត Starlink របស់មហាសេដ្ឋីរូបនេះ។
ទីក្រុងប៉េកាំងបានអះអាងថា ស្ថានីយ៍អវកាសរបស់ប្រទេសចិនបានហោះយ៉ាងកៀកជាមួយផ្កាយរណបចំនួនពីររបស់ក្រុមហ៊ុន Starlink ។ ពាក្យបណ្តឹងរបស់ប្រទេសចិន ដែលដាក់នៅទីភ្នាក់ងារអវកាសរបស់អង្គការសហប្រជាជាតិ មិនទាន់ត្រូវបានផ្ទៀងផ្ទាត់ដោយឯករាជ្យនៅឡើយទេ។
Starlink គឺជាបណ្តាញអ៊ីនធឺណិតផ្កាយរណបដែលដំណើរការដោយក្រុមហ៊ុន SpaceX របស់លោកមហាសេដ្ឋី Musk ។ មហាសេដ្ឋីរូបនេះត្រូវបានគេស្គាល់យ៉ាងច្បាស់នៅក្នុងប្រទេសចិន ទោះបីជាក្រុមហ៊ុនផលិតរថយន្តអគ្គិសនី Tesla របស់លោកស្ថិតនៅក្រោមការត្រួតពិនិត្យកាន់តែខ្លាំងឡើងពីនិយតករចិនក៏ដោយ។
ឯកសារដែលបានដាក់ដោយប្រទេសចិនក្នុងខែនេះទៅកាន់ការិយាល័យអង្គការសហប្រជាជាតិសម្រាប់កិច្ចការអវកាសខាងក្រៅបានបញ្ជាក់ថា ឧបទ្ទវហេតុនេះបានកើតឡើងនៅថ្ងៃទី១ ខែកក្កដា និងថ្ងៃទី២១ ខែតុលា។
ទីក្រុងប៉េកាំងបានឱ្យដឹងនៅក្នុងឯកសារដែលបានចេញផ្សាយនៅលើគេហទំព័ររបស់ទីភ្នាក់ងារនេះថា៖ “ឈរលើហេតុផលសុវត្ថិភាព ស្ថានីយ៍អវកាសចិនបានអនុវត្តការត្រួតពិនិត្យ ដើម្បីទប់ស្កាត់ការប៉ះទង្គិចគ្នា”។
បន្ទាប់ពីពាក្យបណ្តឹងនេះត្រូវបានផ្សព្វផ្សាយជាសាធារណៈ លោក Musk ក្រុមហ៊ុន Starlink របស់លោកនិងសហរដ្ឋអាមេរិកត្រូវបានរងការរិះគន់យ៉ាងចាស់ដៃនៅលើប្រព័ន្ធផ្សព្វផ្សាយ Weibo របស់ចិន។ អ្នកប្រើប្រាស់បណ្ដាញសង្គម្នាក់បានហៅផ្កាយរណបរបស់ក្រុមហ៊ុន Starlink ថាជា “គ្រាន់តែជាគំនរសំរាម”។
អ្នកវិទ្យាសាស្ត្របានសម្តែងការព្រួយបារម្ភអំពីហានិភ័យនៃការប៉ះទង្គិចគ្នានៅក្នុងលំហ ហើយបានអំពាវនាវឱ្យរដ្ឋាភិបាលពិភពលោកចែករំលែកព័ត៌មានអំពីផ្កាយរណបប្រមាណ៣០,០០០ថាស និងកម្ទេចកម្ទីអវកាសផ្សេងទៀតដែលកំពុងធ្វើដំណើរជុំវិញផែនដី។
SpaceX បានបង្ហោះផ្កាយរណបជិត ១,៩០០ថាសរួចមកហើយ ដែលជាផ្នែកមួយនៃបណ្តាញ Starlink ហើយគ្រោងនឹងដាក់ពង្រាយរាប់ពាន់បន្ថែមទៀត៕
