តុលាការអាហ្រ្វិកខាងត្បូងបានសម្រេចផ្អាកការធ្វើតេស្តសម្រាប់ភាពធន់នឹងការរញ្ជួយដីរបស់ក្រុមហ៊ុនប្រេង Shell ក្នុងដំណើរការរុករកប្រេង និងឧស្ម័ននៅតាមបណ្តោយឆ្នេរសមុទ្រភាគខាងកើតរបស់ប្រទេស ដោយរង់ចាំការសម្រេចចុងក្រោយ។
ការសម្រេចចិត្តនេះត្រូវបានសាទរដោយអ្នកបរិស្ថាន ដែលកន្លងមកមានការព្រួយបារម្ភថា សម្លេងពីការធ្វើតេស្ដអាចប៉ះពាល់ដល់ជីវៈចម្រុះក្នុងបាតសមុទ្រ។ ក្រុមហ៊ុនប្រេង Shell បាននិយាយថា ខ្លួនបានផ្អាកប្រតិបត្តិការ ខណៈពេលដែលខ្លួនពិនិត្យលើការសម្រេចរបស់តុលាការ។
រដ្ឋមន្ត្រីថាមពលរបស់អាហ្វ្រិកខាងត្បូងលោក Gwede Mantashe បានថ្កោលទោសអ្នករិះគន់គម្រោងនេះ ដោយនិយាយថា ពួកគេចង់ដកហូតធនធានថាមពលរបស់អាហ្វ្រិក។
នៅក្នុងសេចក្តីសម្រេច ចៅក្រមតុលាការជាន់ខ្ពស់លោក Gerald Bloem បាននិយាយថា សិទ្ធិដែលផ្ដល់ជូនក្រុមហ៊ុន Shell ក្នុងការរុករកលើដែនទឹកនៅជិតតំបន់ Wild Coast ត្រូវបានពិនិត្យឃើញថា មានកំហុសយ៉ាងខ្លាំងក្នុងដំណើរការពិគ្រោះយោបល់។
ឆ្នេរសមុទ្រប្រវែង ២៥០ គីឡូម៉ែត្រក្នុងខេត្ត Eastern Cape ត្រូវបានគេស្គាល់ដោយសារសម្រស់ធម្មជាតិ និងជីវៈចម្រុះក្នុងបាតសមុទ្រ។ ក្រុមអ្នកធ្វើយុទ្ធនាការបានអះអាងថា ជីវៈចម្រុះជាច្រើន រួមទាំងត្រីបាឡែន ផ្សោត និងសត្វភេនឹងត្រូវបានរងផលប៉ះពាល់ ប្រសិនបើក្រុមហ៊ុនធ្វើតេស្តសម្រាប់ភាពធន់នឹងការរញ្ជួយដី។
អ្នកធ្វើយុទ្ធនាការមួយរូបបានស្វាគមន៍ចំពោះសេចក្តីសម្រេចនេះ និងបានថ្លែងថា៖ “ក្នុងនាមជាសហគមន៍ឆ្នេរ យើងបានពឹងផ្អែកលើសមុទ្រជាច្រើនសតវត្សមកហើយ ហើយយើងរីករាយដែលចៅក្រមបានទទួលស្គាល់ថា ការពឹងផ្អែកលើសមុទ្រដើម្បីចិញ្ចឹមជីវិតរបស់យើងមិនត្រូវបានលះបង់ ដើម្បីតែប្រាក់ចំណេញរយៈពេលខ្លី”៕
