ចក្រភពអង់គ្លេសមើលឃើញការធ្វើដំណើរតាមអាកាសធ្លាក់ចុះយ៉ាងខ្លាំងក្នុងឆ្នាំ២០២១

របាយការណ៍ថ្មីមួយបាននិយាយថា វិបត្តិកូវីដ-១៩បានបង្កឱ្យមានការធ្លាក់ចុះ ៧១% នៃជើងហោះហើរអន្តរជាតិទាំងក្នុងនិងក្រៅចក្រភពអង់គ្លេសក្នុងឆ្នាំ២០២១នេះ។ ក្នុងឆ្នាំនេះ ចក្រភពអង់គ្លេសមានប្រតិបត្តិការហោះហើរអន្តរជាតិប្រហែល ៤០៦.០៦០ ជើង បើធៀបនឹងឆ្នាំ២០១៩ ប្រទេសនេះមានការហោះហើររហូតដល់ទៅ ១.៣៩៩.១៧០ ជើង។

ក្រុមហ៊ុនវិភាគវិស័យអាកាសចរណ៍ Cirium បាននិយាយថា ការហោះហើរក្នុងស្រុករបស់ចក្រភពអង់គ្លេសក៏បានធ្លាក់ចុះជិត ៦០% ផងដែរ។

ក្រុមហ៊ុនអាកាសចរណ៍ Ryanair ដែលមានតម្លៃសមរម្យ នៅតែជាក្រុមហ៊ុនអាកាសចរណ៍ធំជាងគេនៅចក្រភពអង់គ្លេស ដោយមានជើងហោះហើរច្រើនជាង ១០ម៉ឺនជើងនៅចក្រភពអង់គ្លេសក្នុងឆ្នាំ ២០២១។ ក្រុមហ៊ុនអាកាសចរណ៍គូប្រជែង easyJet បានតាមពីក្រោយយ៉ាងប្រកៀក ដោយមានជើងហោះហើរសរុបជាង ៨២.០០០ ជើង។ នេះបើយោងតាមទិន្នន័យដែលប្រមូលបានដោយ Cirium ។

ច្រកអន្តរជាតិដែលមមាញឹកបំផុតគឺរវាងអាកាសយានដ្ឋាន Heathrow របស់ទីក្រុងឡុងដ៍ និងអាកាសយានដ្ឋាន JFK របស់ទីក្រុងញូវយ៉ក។

បន្ទាប់ពីការកើនឡើងយ៉ាងខ្លាំងនៃករណីកូវីដ-១៩នៅទូទាំងចក្រភពអង់គ្លេសដោយសារវ៉ារ្យ៉ង់អូមីក្រុង ទស្សនវិស័យផ្នែកអាកាសចរណ៍សម្រាប់ឆ្នាំ២០២២នៅតែមានភាពមិនប្រាកដប្រជា។ ភាពមិនប្រាកដប្រជាបានជំរុញឱ្យមានការកើនឡើងនៃការលុបចោលជើងហោះហើរក្នុងអំឡុងពេលឈប់សម្រាកនេះ ដោយសារតែមានការព្រួយបារម្ភលើការរឹតបន្តឹងបន្ថែមទៀត៕