កំពង់ធំ៖ កម្លាំងនគរបាលខេត្តកំពង់ធំបានឆ្មក់បង្ក្រាប ករណីជួញដូរផ្លូវភេទមួយកន្លែង ឃាត់ខ្លួនបុរសជាជនសង្ស័យម្នាក់ និងរំដោះនារីរងគ្រោះចំនួន១០នាក់ ក្នុងនោះមានអនីតិជនចំនួន៧នាក់។ នេះបើតាមលោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ នៅថ្ងៃទី២៩ ខែធ្នូ ឆ្នាំ២០២១នេះ។
លោកស្នងការបានឱ្យដឹងថា ប្រតិបត្តិការនេះបានធ្វើឡើងដោយមានការសម្របសម្រួលនីតិវិធីពីលោក ស៉ិន វិរៈ ព្រះរាជអាជ្ញាអមសាលាដំបូងខេត្តកំពង់ធំ និងក្រោមការដឹកនាំបញ្ជាផ្ទាល់របស់លោកស្នងការផ្ទាល់។សម្រាប់ប្រតិបត្តិការនេះ ក៏មានការចូលរួមពីសំណាក់លោកស្រីឧត្តមសេនីយ៍ត្រី កង កូយ ស្នងការរងផែនការងារប្រឆាំងការជួញដូរមនុស្ស បានដឹកនាំកម្លាំងជំនាញ សហការជាមួយកម្លាំងអធិការដ្ឋាននគរបាលស្រុកតាំងគោក ចុះបង្ក្រាបករណីជួញដូរផ្លូវភេទមួយកន្លែង ស្ថិតក្នុងភូមិសូយោង ឃុំសូយោង ស្រុកតាំងគោក ខេត្តកំពង់ធំ នាវេលាម៉ោង១៩៖២០នាទី នាថ្ងៃទី២៧ ខែធ្នូ ឆ្នាំ២០២១។
លោកឧត្តមសេនីយ៍ទោ ម៉ែន លី បានបន្ថែមថា សមត្ថកិច្ចបានឃាត់ខ្លួនបានជនសង្ស័យម្នាក់ឈ្មោះ អ៊ូ សុខហៀង ហៅ ប៉ក់ ភេទប្រុស អាយុ៤១ឆ្នាំ រស់នៅទីកន្លែងកើតហេតុខាងលើ។ ក្រោយឃាត់ខ្លួនបុរសជាជនសង្ស័យត្រូវបានបញ្ជូនមកការិយាល័យប្រឆាំងការជួញដូរមនុស្ស និងការពារអនីតិជន ដើម្បីកសាងសំណុំរឿងចាត់ការតាមនីតិវិធីច្បាប់៕
