បាក់រលំអណ្តូងរ៉ែមាសនៅភាគខាងត្បូងប្រទេសស៊ូដង់បណ្ដាលអោយមនុស្សយ៉ាងហោចណាស់៣៨នាក់បាត់បង់ជីវិត

ក្រុមហ៊ុនរបស់រដ្ឋាភិបាលស៊ូដង់បានប្រកាសនៅក្នុងសេចក្តីថ្លែងការណ៍មួយកាលពីថ្ងៃអង្គារថា មនុស្សយ៉ាងហោចណាស់៣៨នាក់បានស្លាប់បាត់បង់ជីវិត បន្ទាប់ពីអណ្តូងរ៉ែមាសមួយបានបាក់រលំនៅក្នុងរដ្ឋ West Kordofan ភាគខាងត្បូងប្រទេសស៊ូដង់។អ្នកគ្រប់គ្រងទូទៅនៃក្រុមហ៊ុន Sudanese Mineral Resources Company Limitedបានសំដែងការសោកស្ដាយនៅក្នុងសេចក្ដីថ្លែងការណ៍មួយចំពោះការស្លាប់របស់កម្មករអណ្តូងរ៉ែទាំង៣៨នាក់ ដែលបានស្លាប់ដោយសារការដួលរលំនៃអណ្តូងរ៉ែUmm Draisaya។

អណ្តូងរ៉ែមាសដែលបានដួលរលំនោះស្ថិតនៅក្បែរទីក្រុង El Nuhud ក្នុងរដ្ឋ West Kordofanចម្ងាយប្រហែល៥០០គីឡូម៉ែត្រពីភាគខាងលិចនៃរដ្ឋធានី Khartoum របស់ប្រទេសស៊ូដង់។
ក្រុមហ៊ុនបាននិយាយថាអភិបាលរដ្ឋWest Kordofanនិងគណៈកម្មាធិការសន្តិសុខរបស់រដ្ឋបានចេញសេចក្តីសម្រេចអោយបិទអណ្តូងរ៉ែខាងលើនោះដោយលើកឡើងពីស្ថានភាពមិនសមស្របនៃការជីកយករ៉ែមុនពេលវាបានដួលរលំ។
ទោះជាយ៉ាងនេះក្តីក៏ក្រុមអ្នករុករករ៉ែនៅតែបន្តធ្វើការក្នុងអណ្តូងរ៉ែនោះដដែលទើបបានជាពួកគេជួបគ្រោះអកុសលយ៉ាងដូច្នេះ។

បច្ចុប្បន្នប្រទេសស៊ូដង់មានបុគ្គលិកប្រមាណជាង២លាននាក់កំពុងធ្វើការនៅក្នុងឧស្សាហកម្មរុករករ៉ែប្រពៃណីនៅទូទាំងប្រទេស។
យោងតាមស្ថិតិផ្លូវការ ការជីកយករ៉ែបែបប្រពៃណីបានរួមចំណែកប្រមាណ៧៥ភាគរយនៃផលិតកម្មមាសសរុបនៅក្នុងស្រុកដែលមានជាង៩៣តោនក្នុងមួយឆ្នាំ៕