អន្តរជាតិ៖នៅថ្ងៃព្រហស្បត្តិ៍សប្ដាហ៍នេះជាថ្ងៃគម្រប់ខួប១០ឆ្នាំ ដែលមេដឹកនាំកូរ៉េខាងជើង លោក គីម ជុងអ៊ុន ក្លាយជាមេទ័ពកំពូលប្រទេស បន្ទាប់ពីមរណភាពរបស់ឪពុកលោកគឺលោក គីម ជុងអ៊ីល។ចំពេលមានការជាប់គាំងកិច្ចពិភាក្សាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិក លោក គីម បានបញ្ជាក់យ៉ាងច្បាស់ថាលោកនឹងជំរុញទៅមុខជាមួយនឹងការអភិវឌ្ឍន៍កម្មវិធីនុយក្លេអ៊ែរនិងមីស៊ីល។ក្រសួងការពារជាតិជប៉ុនបាននិយាយថា កូរ៉េខាងជើងទំនងជាបានបាញ់សាកល្បងមីស៊ីលផ្លោងជាង៩០គ្រាប់ រួមទាំងមីស៊ីលផ្លោងអន្តរទ្វីប ក្នុងរយៈពេលមួយទសវត្សរ៍កន្លងមកនេះ។
បើប្រៀបធៀបក្នុងរយៈពេល១៧ឆ្នាំនៃការកាន់អំណាចរបស់ឪពុកលោកគីមនោះមានតែកាំជ្រួច១៦ដើមប៉ុណ្ណោះដែលត្រូវបានបាញ់សាកល្បង។ទីក្រុងព្យុងយ៉ាងបានធ្វើការសាកល្បងអាវុធនុយក្លេអ៊ែរចំនួនបួនលើក ហើយក្នុងឆ្នាំ ២០១៧បានអះអាងថា ខ្លួនបានទទួលជោគជ័យក្នុងការសាកល្បងគ្រាប់បែកអ៊ីដ្រូសែនដែលអាចបំពាក់នៅលើក្បាលគ្រាប់ប្រភេទICBMទៀតផង។
យ៉ាងណាក៏ដោយ, ប្រទេសកូរ៉េខាងជើងបាននឹងកំពុងចរចាសម្រាប់ការបន្ធូរបន្ថយទណ្ឌកម្មដែលដាក់ប្រឆាំងនឹងខ្លួននិងការផ្អាកការធ្វើសមយុទ្ធយោធារួមគ្នាដោយសហរដ្ឋអាមេរិកនិងកូរ៉េខាងត្បូង ប៉ុន្តែកិច្ចពិភាក្សាទាំងនោះបានបង្ហាញពីវឌ្ឍនភាពតិចតួចប៉ុណ្ណោះ។នៅក្នុងសុន្ទរកថារបស់កាលពីខែតុលា លោក Kim បានសម្តែងការមិនទុកចិត្តរបស់លោកចំពោះទីក្រុងវ៉ាស៊ីនតោន ហើយបានបង្ហាញពីការត្រៀមខ្លួនដើម្បីបន្តការអភិវឌ្ឍន៍កម្មវិធីនុយក្លេអ៊ែរ និងមីស៊ីល ដើម្បីពង្រឹងសម្ថភាពការពារខ្លួន។
សូមជម្រាបថាខួបលើកទី១០ឆ្នាំនៃការកាន់អំណាចរបស់លោក Kim ធ្វើឡើងស្របគ្នានឹងកិច្ចប្រជុំពេញអង្គរបស់គណៈកម្មាធិការកណ្តាលនៃគណបក្សពលករកូរ៉េ។ កិច្ចប្រជុំបានចាប់ផ្តើមកាលពីថ្ងៃចន្ទដោយមានលោកគីមចូលរួមដឹកនាំ។
នៅពេលនេះពិភពលោកកំពុងរងចាំមើលថាតើលោក Kim នឹងលើកឡើងអំពីការអភិវឌ្ឍន៍កម្មវិធីនុយក្លេអ៊ែរនិងមីស៊ីលដែរឬទេ៕
