ក្រុមអ្នកគាំទ្រមជ្ឈមណ្ឌលសិទ្ធិមនុស្សនៃការចងចាំ (Memorial Human Rights Center) របស់រុស្ស៊ីបាននាំគ្នាស្រែកតវ៉ានៅខាងក្រៅបរិវេណតុលាការនៅពេលដែលមជ្ឈមណ្ឌលនេះត្រូវបានតុលាការសម្រេចឱ្យបិទទ្វារនៅថ្ងៃពុធ ទី២៩ ខែធ្នូ ឆ្នាំ២០២១។ ការសម្រេចនេះបានកើតឡើងមួយថ្ងៃ បន្ទាប់ពីអង្គការការចងចាំអន្ដរជាតិ (Memorial International) ដែលជាក្រុមសិទ្ធិមនុស្សចាស់បំផុតរបស់រុស្ស៊ី ត្រូវបានបង្ខំឱ្យបិទផងដែរ។
ការបង្ក្រាបតាមផ្លូវច្បាប់បានកើតឡើងរយៈពេលមួយឆ្នាំមកហើយលើអ្នករិះគន់វិមានក្រឹមឡាំង ដែលពុំធ្លាប់កើតមានក្រោយសម័យសូវៀត។
អ្នកស្រី Anna Dobrovolskaya នាយកប្រតិបត្តិនៃមជ្ឈមណ្ឌលនេះ បាននិយាយថា សកម្មភាពនេះនឹងជះឥទ្ធិពលត្រជាក់ដល់សកម្មជនសិទ្ធិមនុស្សផ្សេងទៀត។
លោកស្រីបានថ្លែងថា៖ “មនុស្សជាច្រើនមើលឃើញថា អង្គការ Memorial ជានិមិត្តរូប និងជាតួអង្គឈានមុខគេ ដែលនិយាយឱ្យចំទៅ គឺទាំងមជ្ឈមណ្ឌលសិទ្ធិមនុស្សនៃការចងចាំនិងអង្គការការចងចាំអន្ដរជាតិ។ មនុស្សជាច្រើនមានការខកចិត្តចំពោះព្រឹត្តិការណ៍ទាំងនេះ។ មនុស្សជាច្រើនសរសេរថា យុគសម័យងងឹតនឹងមកដល់”។
មជ្ឈមណ្ឌលសិទ្ធិមនុស្សបានរក្សាទុកបញ្ជីឈ្មោះបុគ្គលដែលខ្លួនចាត់ថ្នាក់ជាអ្នកទោសនយោបាយ រួមទាំងអ្នករិះគន់វិមានក្រឹមឡាំង លោក Alexei Navalny ក៏ដូចជាសាក្សីព្រះយេហូវ៉ា និងជនមូស្លីមដែលត្រូវបានកាត់ទោសពីបទភេរវកម្ម។
រដ្ឋអាជ្ញាបាននិយាយថា ការងាររបស់មជ្ឈមណ្ឌលនេះមានផ្ដល់ភាពត្រឹមត្រូវចំពោះអំពើភេរវកម្ម និងភាពជ្រុលនិយម។ ក្រុមអ្នករិះគន់និយាយថា លោកប្រធានាធិបតី វ្ល៉ាឌីមៀ ពូទីន កំពុងបង្វែរពេលវេលាទៅរកសម័យសូវៀត ដែលជាសម័យកាលកំទេចចោលរាល់អ្វីដែលមិនពេញចិត្ត។
វិមានក្រឹមឡាំងមិនមានការអត្ថាធិប្បាយភ្លាមៗជុំវិញករណីនេះឡើយ ហើយបានបញ្ជាក់ថា ខ្លួនមិនជ្រៀតជ្រែកក្នុងការសម្រេចចិត្តរបស់តុលាការ៕
