បុរសម្នាក់ត្រូវបានចាប់ខ្លួនបន្ទាប់ពីអគ្គិភ័យបានឆាបឆេះយ៉ាងខ្លាំងនិងបានបំផ្លាញរដ្ឋសភាក្នុងទីក្រុង Cape Town របស់ប្រទេសអាហ្វ្រិកខាងត្បូង។អ្នកនាំពាក្យប៉ូលិសបាននិយាយថា បុរសនេះកំពុងប្រឈមមុខនឹងការចោទប្រកាន់ពីបទដុតបំផ្លាញ និងចោរកម្ម ហើយនឹងបង្ហាញខ្លួននៅតុលាការនៅថ្ងៃអង្គារ។ ក្រុមអ្នកពន្លត់អគ្គីភ័យបានធ្វើការជាច្រើនម៉ោងដើម្បីពន្លត់ភ្លើង។
លោកប្រធានាធិបតី Cyril Ramaphosa បានហៅវាថាជា “ព្រឹត្តិការណ៍ដ៏គួរឱ្យភ័យខ្លាចនិងបំផ្លិចបំផ្លាញ” ខណៈដែលលោកបានប្តេជ្ញាថា ការងាររបស់សភានឹងបន្ត។ វីដេអូពីកន្លែងកើតហេតុកាលពីថ្ងៃអាទិត្យ បានបង្ហាញពីផ្សែងខ្មៅពេញផ្ទៃមេឃ ដោយមានអណ្តាតភ្លើងយ៉ាងធំចេញពីដំបូលអគារ។
ក្រុមមន្ត្រីបាននិយាយថា ភ្លើងបានចាប់ផ្ដើមឆាបឆេះនៅការិយាល័យជាន់ទី៣ ហើយបានរីករាលដាលយ៉ាងឆាប់រហ័សទៅកាន់សភាជាតិ (សភាជាន់ទាប)។ នៅថ្ងៃកើតហេតុ សភាមិនបានបើកសម័យប្រជុំទេ ដោយសារចំថ្ងៃឈប់សម្រាក ហើយមិនមានរាយការណ៍ថាមានអ្នករបួសនោះឡើយ។
ក្នុងសេចក្តីថ្លែងការណ៍មួយកាលពីយប់ថ្ងៃអាទិត្យ សភាអាហ្រ្វិកខាងត្បូងបានបញ្ជាក់ថាមានការខូចខាតយ៉ាងដំណំចំពោះអគារសភាថ្មី ដែលរួមមានសាលប្រជុំរបស់សភាជាតិ ដែលជាកន្លែងសមាជិកសភាអង្គុយបំពេញការងារ។ សេចក្ដីថ្លែងការណ៍ក៏បានបន្ដផងដែរថា ការិយាល័យមួយចំនួនបានរងការបំផ្លាញយ៉ាងធ្ងន់ធ្ងរ។
គួរបញ្ជាក់ផងដែរថា អគ្គីភ័យដែលបានចាប់ផ្តើមនៅម៉ោង ០៦:០០ ម៉ោងក្នុងស្រុក (០៤:០០ GMT) បានកើតឡើងមួយថ្ងៃ បន្ទាប់ពីពិធីបុណ្យសពរបស់លោកឳ Desmond Tutu នៅវិហារ St George’s Cathedral ដែលមានទីតាំងនៅជិតសភា៕
