នាយករដ្ឋមន្ត្រីស៊ូដង់ លោក Abdalla Hamdok បានលាលែងពីតំណែង បន្ទាប់ពីមានការតវ៉ាដ៏ធំមួយបានធ្វើឱ្យកក្រើករដ្ឋធានី Khartoum ។ មនុស្សរាប់ពាន់នាក់បានដើរក្បួនប្រឆាំងនឹងកិច្ចព្រមព្រៀងថ្មីៗនេះ ដែលបានចែករំលែកអំណាចជាមួយកងទ័ពដែលបានធ្វើរដ្ឋប្រហារកាលពីខែតុលាកន្លងទៅ។
ក្រុមអ្នកតវ៉ាបានអំពាវនាវឱ្យមានការវិលត្រឡប់ទៅកាន់ការគ្រប់គ្រងផ្នែកស៊ីវិលពេញលេញវិញ ប៉ុន្តែកម្លាំងយោធាបានបើកការបង្ក្រាបដោយហិង្សាមួយទៀតដែលបណ្តាលឲ្យមនុស្សពីរនាក់ស្លាប់។ ការសម្រេចចិត្តលាលែងពីតំណែងរបស់លោក Hamdok បានធ្វើឱ្យកងទ័ពមានការគ្រប់គ្រងទាំងស្រុង។
វាគឺជាការវាយប្រហារមួយផ្សេងទៀតចំពោះការប៉ុនប៉ងដ៏ផុយស្រួយរបស់ប្រទេសស៊ូដង់ក្នុងការផ្លាស់ប្តូរទៅកាន់ការគ្រប់គ្រងតាមបែបប្រជាធិបតេយ្យ បន្ទាប់ពីការបះបោរដ៏ធំមួយ ដែលបានឈានទៅដល់ការផ្តួលរំលំប្រធានាធិបតីផ្តាច់ការយូរអង្វែងរបស់ប្រទេសស៊ូដង់ លោក Omar al-Bashir ក្នុងឆ្នាំ២០១៩។
នៅក្នុងសុន្ទរកថាតាមទូរទស្សន៍ លោក Hamdok បាននិយាយថា ប្រទេសនេះគឺស្ថិតចំចំណុចរបត់ដ៏គ្រោះថ្នាក់ ដែលគំរាមកំហែងដល់ការរស់រានមានជីវិតទាំងមូល។ លោកបានបន្ដថា លោកបានព្យាយាមអស់ពីសមត្ថភាពដើម្បីបញ្ឈប់ប្រទេសពីការធ្លាក់ចូលគ្រោះមហន្តរាយ ប៉ុន្តែអ្វីៗគ្រប់យ៉ាងដែលបានធ្វើដើម្បីឈានដល់ការឯកភាពគ្នាគឺមិនអាចកើតឡើងបានឡើយ។
គួរបញ្ជាក់ផងដែរថា មេដឹកនាំផ្នែកស៊ីវិលនិងផ្នែកយោធាបានចុះកិច្ចព្រមព្រៀងចែករំលែកអំណាចមួយ បន្ទាប់ពីកងទ័ពបានធ្វើរដ្ឋប្រហារនៅថ្ងៃទី២៥ ខែតុលា ហើយដំបូងឡើយក្រុមកងទ័ពបានឃុំឃាំងខ្លួនលោកនាយករដ្ឋមន្ត្រី Hamdok នៅក្នុងផ្ទះរបស់លោក៕
