សមាជិកសភាបារាំងដែលគាំទ្របណ្ណចាក់វ៉ាក់សាំង ទទួលបានសារគំរាមសម្លាប់

សមាជិកសភាបារាំងជាច្រើននាក់និយាយថា ពួកគេបានទទួលសារគំរាមសម្លាប់ ខណៈដែលពួកគេជជែកពិភាក្សាគ្នាអំពីការប្រើប្រាស់បណ្ណចាក់វ៉ាក់សាំងបង្ការជំងឺកូវីដ-១៩ ដែលនឹងរារាំងជនមិនទាន់ចាក់វ៉ាក់សាំងពីការធ្វើដំណើរចេញចូលដោយសេរី​នៅតាមទីតាំងមួយចំនួនធំ។

រដ្ឋាភិបាលប្រទេសនេះកំពុងស្វែងរកការអនុម័តច្បាប់មួយដែលតម្រូវឱ្យប្រជាជនបង្ហាញភស្តុតាងនៃការចាក់ថ្នាំបង្ការ ដើម្បីអាចចេញចូលទីកន្លែងសាធារណៈនិងប្រើប្រាស់មធ្យោបាយធ្វើដំណើរសាធារណៈ ដោយមានករណីលើកលែងមួយចំនួន។

ច្បាប់នេះត្រូវបានគេរំពឹងថានឹងអនុម័តនៅក្នុងការបោះឆ្នោតនៅសប្តាហ៍នេះ ប៉ុន្តែច្បាប់នេះក៏បានធ្វើឱ្យជនប្រឆាំងការចាក់វ៉ាក់សាំងមានការខឹងសម្បារផងដែរ។ ប្រទេសបារាំងមានអត្រាចាក់វ៉ាក់សាំងបង្ការជំងឺកូវីដ-១៩ដ៏ខ្ពស់បំផុតមួយនៅក្នុងសហភាពអឺរ៉ុប។

រដ្ឋាភិបាលបារាំងបានឱ្យដឹងថា យ៉ាងហោចណាស់ ៩១% នៃចំនួនប្រជាជនពេញវ័យបានទទួលថ្នាំបង្ការពេញលេញ។

កាលពីថ្ងៃអាទិត្យ សមាជិកសភា លោកស្រី Agnès Firmin Le Bodo បានបង្ហោះសារលើបណ្ដាញសង្គមថ្វីតធ័រថា លោកស្រីបានទទួលសារអ៊ីម៉ែលមួយ ដែលអ្នកផ្ញើបានគំរាមសម្លាប់លោកស្រី ដោយសារតែលោកស្រីគាំទ្រការប្រើប្រាស់បណ្ណចាក់វ៉ាក់សាំង។ លោកស្រីបានសរសេរថា៖ “លទ្ធិប្រជាធិបតេយ្យរបស់យើងស្ថិតក្នុងគ្រោះថ្នាក់”។

នៅក្នុងបទសម្ភាសន៍ជាមួយទូរទស្សន៍ BFM លោកស្រីបាននិយាយថា លោកស្រីបានរាយការណ៍ពីការគំរាមកំហែងនេះដល់ប៉ូលីសរួចជាស្រេច ហើយការគំរាមនេះនឹងមិនរារាំងលោកស្រីពីការគាំទ្រការប្រើប្រាស់បណ្ណចាក់វ៉ាក់សាំងឡើយ។

សមាជិកសភាម្នាក់ទៀតគឺលោកស្រី Naïma Moutchou ក៏បានបង្ហោះសារលើប្រព័ន្ធថ្វីតធ័រស្រដៀងគ្នាផងដែរ ដែលលោកស្រីទទួលបានសារគំរាមសម្លាប់តាមរយៈអ៊ីម៉ែល។

នៅក្នុងសភាកាលពីថ្ងៃចន្ទ រដ្ឋមន្ត្រីក្រសួងសុខាភិបាលលោក Olivier Véran បានថ្កោលទោសការគំរាមសម្លាប់សមាជិកសភា និងភាពអាត្មានិយមរបស់ក្រុមអ្នកប្រឆាំងការចាក់វ៉ាក់សាំង៕