ក្រុមមន្ត្រី៖ លោកនាយករដ្ឋមន្ត្រីហៃទីរួចផុតពីការប៉ុនប៉ងធ្វើឃាត

ក្រុមមន្ត្រីបាននិយាយថា ខ្មាន់កាំភ្លើងបានព្យាយាមសម្លាប់នាយករដ្ឋមន្ត្រីហៃទី លោក Ariel Henry ក្នុងអំឡុងពេលព្រឹត្តិការណ៍ប្រារព្ធខួបឯករាជ្យជាតិរបស់ប្រទេសកាលពីថ្ងៃសៅរ៍។ ហេតុការណ៍នេះបានកើតឡើងនៅពេលដែលលោក Henry បានចូលរួមក្នុងពិធីនៅឯព្រះវិហារមួយនៅភាគខាងជើងនៃទីក្រុង Gonaïves ។

វីដេអូដែលបានបង្ហោះតាមប្រព័ន្ធអ៊ីនធឺណិតបានបង្ហាញពីទិដ្ឋភាពលោកនាយករដ្ឋមន្ត្រី និងបក្ខពួករបស់លោកកំពុងធ្វើដំណើរឆ្ពោះទៅកាន់រថយន្ត ចំពេលមានការបាញ់កាំភ្លើងយ៉ាងខ្លាំងក្លា។

ស្ថានភាពសន្តិសុខកាន់តែយ៉ាប់យ៉ឺនខ្លាំង ចាប់តាំងពីការធ្វើឃាតប្រធានាធិបតីហៃទី លោក Jovenel Moïse កាលពីខែកក្កដា ឆ្នាំ២០២១ កន្លងទៅ។

លោកនាយករដ្ឋមន្ត្រី Henry បានសន្យាថានឹងបង្រ្កាបក្រុមជនអន្ធពាលដ៏មានឥទ្ធិពល ដែលនៅពីក្រោយការចាប់ជំរិត និងការដណ្តើមគ្រប់គ្រងការចែកចាយប្រេងឥន្ធនៈនៅជុំវិញប្រទេស ដែលបណ្តាលឱ្យមានការខ្វះខាតប្រេងឥន្ធនៈធ្ងន់ធ្ងរ។

ការិយាល័យនាយករដ្ឋមន្ត្រីបានឱ្យដឹងថា ក្រុមចោរ និងភេរវករគឺជាអ្នកនៅពីក្រោយការប៉ុនប៉ងធ្វើឃាត ហើយដីកាចាប់ខ្លួនជនសង្ស័យក៏បានចេញរួចរាល់ផងដែរ។

សារព័ត៌មាន Associated Press បានចេញផ្សាយថា ការិយាល័យបានចោទប្រកាន់ក្រុមនេះថាបានលាក់ខ្លួននៅពីក្រោយជញ្ជាំង ដើម្បីវាយប្រហារក្បួនរថយន្តនិងគំរាមកំហែងដល់បព្វជិតតាមរយៈការឡោមព័ទ្ធជុំវិញព្រះវិហារ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សម្នាក់បានស្លាប់ និងពីរនាក់ទៀតបានរងរបួសនៅក្នុងការបាញ់ប្រហារគ្នារវាងក្រុមប្រដាប់អាវុធ និងកងកម្លាំងសន្តិសុខ៕