អន្តរជាតិ៖ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានបញ្ជាក់ថា ប្រទេសនេះបានបាញ់សាកល្បងមីស៊ីលហាយភើសូនិកដោយជោគជ័យកាលពីថ្ងៃពុធ។កាសែត Rodong Sinmunបាននិយាយថាបណ្ឌិត្យសភាវិទ្យាសាស្ត្រការពារជាតិរបស់ប្រទេសនេះបានធ្វើការបាញ់សាកល្បង។ កាសែតបានរាយការណ៍ថាកាំជ្រួចនេះបានហោះចំគោលដៅដែលមានចម្ងាយ ៧០០ គីឡូម៉ែត្រ។មន្ត្រីយោធាកូរ៉េខាងត្បូងបាននិយាយថា ការបាញ់បង្ហោះនេះធ្វើឡើងនៅក្នុងខេត្ត Jagang ហើយកាំជ្រួចបានហោះឆ្ពោះទៅសមុទ្រ។
សូមជ្រាបថាមីស៊ីលហាយភើសូនិកនេះ ត្រូវបានរចនាឡើងដោយមានល្បឿនលឿនជាងសំឡេងរហូតដល់៥ដងឯណោះ។ ពួកគេអាចហោះហើរក្នុងរយៈកម្ពស់ទាបបំផុតនិងផ្លាស់ប្តូរផ្លូវហោះហើរបានយ៉ាងឆាប់រហ័សដែលធ្វើឲ្យប្រព័ន្ធការពារអាកាសពិបាកក្នុងការស្វែងរកនិងស្ទាក់ចាប់ពួកគេ។
សហរដ្ឋអាមេរិក រុស្ស៊ី និងចិនស្ថិតក្នុងចំណោមប្រទេសដែលបានអភិវឌ្ឍមីស៊ីលប្រភេទនេះខណៈដែលប្រទេសកូរ៉េខាងជើងបានបាញ់សាកល្បងជាលើកដំបូងនៅក្នុងខែកញ្ញា។
កាលពីឆ្នាំមុន ប្រទេសកូរ៉េខាងជើងបានបង្ហាញផែនការការពាររយៈពេលប្រាំឆ្នាំ ដែលរួមបញ្ចូលទាំងការអភិវឌ្ឍមីស៊ីលប្រភេទផ្សេងៗ។នៅខែតុលាឆ្នាំ២០២១ របបក្រុងព្យូងយ៉ាងបានបាញ់សាកល្បងដោយជោគជ័យនូវកាំជ្រួចមីស៊ីលផ្លោងអន្តរទ្វីបចេញពីនាវាមុជទឹក៕
