កោះតៃវ៉ាន់បានឱ្យដឹងថា ខ្លួននឹងបង្កើតមូលនិធិមួយក្នុងទំហំ ២០០ លានដុល្លារ ដើម្បីវិនិយោគនៅក្នុងប្រទេសលីទុយអានី ខណៈដែលខ្លួនព្យាយាមការពារចំណងការទូត និងសម្ពាធពាណិជ្ជកម្មរបស់ចិនលើប្រទេសនេះ។
ទីក្រុងតៃប៉ិបាននិយាយថា ខ្លួនមានបំណងធ្វើការវិនិយោគដំបូងរបស់ខ្លួននៅចុងឆ្នាំនេះ ហើយថវិកាត្រូវបានធានាដោយមូលនិធិអភិវឌ្ឍន៍ជាតិ និងធនាគារកណ្តាលរបស់ខ្លួន។
ការប្រកាសនេះបានកើតឡើង បន្ទាប់ពីប្រទេសលីទុយអានីបានអនុញ្ញាតឱ្យកោះតៃវ៉ាន់បើកស្ថានទូតនៅក្នុងប្រទេសខ្លួន ដែលជាសញ្ញាដ៏មានសក្តានុពលក្នុងផ្នែកចំណងការទូត។ ប៉ុន្មានថ្ងៃបន្ទាប់ពីការបើកភ្លើងខៀវឱ្យតៃវ៉ាន់បង្កើតស្ថានទូត ចិនបានទម្លាក់កម្រិតទំនាក់ទំនងការទូតរបស់ខ្លួនជាមួយប្រទេសលីទុយអានី។ក្នុងពេលប្រកាសពីផែនការនេះ អនុរដ្ឋមន្ត្រីការបរទេសកោះតៃវ៉ាន់ លោក Harry Ho-jen Tseng បានប្រាប់ប្រទេសលីទុយអានីថា៖ “វាដល់ពេលហើយសម្រាប់ពួកយើងដើម្បីជួយដោះស្រាយការលំបាករបស់អ្នក”។
កោះតៃវ៉ាន់កំពុងចែករំលែកគន្លឹះជាមួយសាធារណជនអំពីរបៀបផឹកនិងចម្អិនម្ហូបជាមួយស្រា Rum បន្ទាប់ពីខ្លួនបានទិញស្រាប្រភេទនេះពីលីទុយអានីចំនួន២ម៉ឺនដប ដែលដើមឡើយត្រៀមសម្រាប់លក់ឱ្យចិន។
ប្រព័ន្ធផ្សព្វផ្សាយរដ្ឋបានរាយការណ៍ថា ក្រុមហ៊ុនថ្នាំជក់និងស្រារបស់តៃវ៉ាន់បានទិញស្រា Rum បន្ទាប់ពីបានដឹងថា ស្រានេះអាចត្រូវបានរារាំងមិនឱ្យនាំចូលទៅក្នុងប្រទេសចិន។ប្រទេសចិនបានបដិសេធការទប់ស្កាត់ពាណិជ្ជកម្មប្រទេសលីទុយអានី ដែលនឹងបំពានច្បាប់ពាណិជ្ជកម្មសកល ប៉ុន្តែសហភាពអឺរ៉ុបបាននិយាយថា ខ្លួនបានផ្ទៀងផ្ទាត់របាយការណ៍នៃទំនិញដែលត្រូវបានរក្សាទុកនៅគយចិន។
បញ្ហាជាមួយនឹងការនាំចូលស្រា Rum គឺជាឧទាហរណ៍ចុងក្រោយបង្អស់ដែលត្រូវបានរាយការណ៍ថាបានប៉ះពាល់ដល់អាជីវកម្មលីទុយអានី បើទោះបីជាប្រទេសចិនមានត្រឹមតែ ១% នៃការនាំចេញរបស់ប្រទេសលីទុយអានីក៏ដោយ៕
