ប្រទេសអ៊ីតាលី កាលពីថ្ងៃពុធ បានប្រកាសពីកាតព្វកិច្ចចាក់វ៉ាក់សាំងសម្រាប់ប្រជាជនដែលមានវ័យចាប់ពី៥០ឆ្នាំឡើងទៅ។ ប្រទេសក្នុងទ្វីបអឺរ៉ុបនេះគឺស្ថិតក្នុងចំណោមប្រទេសដ៏តិចតួចបំផុត ដែលអនុវត្តវិធានការដូច្នេះ ក្នុងគោលបំណងកាត់បន្ថយអត្រាស្លាប់ និងបន្ធូរបន្ថយសម្ពាធលើប្រព័ន្ធសុខាភិបាលរបស់ខ្លួន។វិធានការនេះមានប្រសិទ្ធភាពភ្លាមៗ ហើយនឹងអនុវត្តរហូតដល់ថ្ងៃទី១៥ ខែមិថុនា។ប្រទេសអ៊ីតាលីបានរាយការណ៍ការស្លាប់ដោយសារមេរោគកូវីដ-១៩ច្រើនជាង ១៣៨,០០០នាក់ ចាប់តាំងពីពេលផ្ទុះឡើងក្នុងខែកុម្ភៈ ឆ្នាំ២០២០ ដែលជាចំនួនអ្នកស្លាប់ខ្ពស់បំផុតទីពីរនៅអឺរ៉ុប បន្ទាប់ពីចក្រភពអង់គ្លេស។
លោកនាយករដ្ឋមន្ត្រី Mario Draghi ក៏បានកំណត់កាតព្វកិច្ចចាក់វ៉ាក់សាំងសម្រាប់គ្រូបង្រៀននិងបុគ្គលិកសុខាភិបាលផងដែរ ហើយចាប់តាំងពីខែតុលា ឆ្នាំមុន និយោជិតទាំងអស់ចាំបាច់ត្រូវចាក់វ៉ាក់សាំង ឬបង្ហាញការធ្វើតេស្តអវិជ្ជមាន មុនពេលចូលកន្លែងធ្វើការ។
បុគ្គលដែលបដិសេធមិនព្រមចាក់វ៉ាក់សាំង ឬបង្ហាញលទ្ធផលធ្វើតេស្ដអាចត្រូវបានព្យួរការងារដោយគ្មានប្រាក់ឈ្នួល ប៉ុន្តែមិនត្រូវបានបណ្តេញចេញឡើយ ។
ក្រឹត្យកាលពីថ្ងៃពុធបានរឹតបន្ដឹងលើកិច្ចការនេះចំពោះកម្មករនិងនិយោជិតដែលមានអាយុលើសពី ៥០ ឆ្នាំ ដោយបានដកចេញនូវជម្រើសបង្ហាញការធ្វើតេស្ដចេញ។ ក្រឹត្យនេះត្រូវបានអនុម័ត បន្ទាប់ពីកិច្ចប្រជុំគណៈរដ្ឋមន្ត្រីរយៈពេលពីរម៉ោងកន្លះ ដែលមានការប៉ះទង្គិចនៅក្នុងសម្ព័ន្ធពហុបក្សរបស់លោកនាយករដ្ឋមន្ត្រី Draghi ។
លោក Draghi បានប្រាប់គណៈរដ្ឋមន្ត្រីថា៖ “វិធានការថ្ងៃនេះមានគោលបំណងធ្វើឱ្យមន្ទីរពេទ្យមានដំណើរការល្អ ហើយក្នុងពេលតែមួយ អាចបន្ដឱ្យសាលារៀនបើកទ្វារ និងអនុញ្ញាតឱ្យមានសកម្មភាពនានាក្នុងផ្នែកអាជីវកម្ម”។ នេះបើយោងតាមអ្នកនាំពាក្យរបស់លោកនាយករដ្ឋមន្ត្រី៕
