របាយការណ៍៖ មនុស្សយ៉ាងហោចណាស់១៦៤នាក់ស្លាប់ក្នុងការបះបោរនៅកាហ្សាក់ស្ថាន

មនុស្សយ៉ាងហោចណាស់ចំនួន ១៦៤ នាក់បានស្លាប់បាត់បង់ជីវិតនៅក្នុងប្រទេសកាហ្សាក់ស្ថាន ក្នុងអំឡុងពេលធ្វើបាតុកម្មហិង្សាប្រឆាំងរដ្ឋាភិបាល។ នេះបើយោងតាមរបាយការណ៍របស់ប្រព័ន្ធផ្សព្វផ្សាយ ដែលបានដកស្រង់សម្តីមន្ត្រីសុខាភិបាល។

ប្រសិនបើតួលេខនេះត្រូវបានបញ្ជាក់ថាត្រឹមត្រូវ វាគឺជាកើនឡើងយ៉ាងខ្ពស់នៃតួលេខអ្នកស្លាប់ ដែលកើនលើសអត្រាចាស់ ៤៤ នាក់។ ការិយាល័យប្រធានាធិបតីកាហ្សាក់ស្ថានបានឱ្យដឹងកាលពីថ្ងៃអាទិត្យថា មនុស្សជិត ៦,០០០ នាក់ត្រូវបានចាប់ខ្លួន រួមទាំងជនបរទេសមួយចំនួនធំផងដែរ។

ការតវ៉ាដែលបង្កឡើងដោយការឡើងថ្លៃតម្លៃប្រេងបានប្រែក្លាយទៅជាបាតុកម្មហិង្សាដ៏ធំ ហើយរីករាលដាលពេញប្រទេស។
ការបះបោរបានចាប់ផ្តើមនៅថ្ងៃទី២ ខែមករា ហើយបានរីកសាយកាន់តែធំ ដោយសារតែប្រជាពលរដ្ឋព្យាយាមសម្ដែងការមិនពេញចិត្តចំពោះរដ្ឋាភិបាលនិងលោកអតីតប្រធានាធិបតី Nursultan Nazarbayev ដែលបានដឹកនាំប្រទេសកាហ្សាក់ស្ថានអស់រយៈពេល ៣ទសវត្សរ៍ ហើយប្រជាជននៅតែបន្ដគិតថា ក្រុមនេះនៅតែបន្ដរក្សាឥទ្ធិពល។

កាលពីសប្តាហ៍មុន ទាហានមកពីប្រទេសជាច្រើនរួមទាំងរុស្ស៊ីត្រូវបានបញ្ជូនទៅកាហ្សាក់ស្ថាន ដើម្បីជួយស្តារសណ្តាប់ធ្នាប់។
សេចក្តីថ្លែងការណ៍របស់លោកប្រធានាធិបតីបានបន្ថែមថា ស្ថានការណ៍មានស្ថិរភាព ដោយកងទ័ពកំពុងបន្តប្រតិបត្តិការបោសសម្អាត និងយាមកាមទីតាំងយុទ្ធសាស្ត្រ។ ការប្រកាសភាពអាសន្ន និងបម្រាមគោចរទូទាំងប្រទេសនៅតែបន្ដអនុវត្ត៕