លោក Fumio Kishida នាយករដ្ឋមន្ត្រីជប៉ុនបាននិយាយកាលពីថ្ងៃអង្គារថា ប្រទេសជប៉ុននឹងរក្សាការរឹតបន្តឹងនៅតាមព្រំដែនរហូតដល់ចុងខែកុម្ភៈ ដើម្បីការពារការរីករាលដាលវ៉ារ្យ៉ង់អូមីក្រុង ប៉ុន្ដែការលើកលែងមួយចំនួនក្រោមហេតុផលមនុស្សធម៌អាចត្រូវបានពិចារណា។
ប្រទេសជប៉ុនបានអនុម័តការគ្រប់គ្រងព្រំដែនដ៏តឹងរ៉ឹងបំផុត នៅពេលដែលវ៉ារ្យ៉ង់អូមីក្រុងបានលេចឡើងកាលពីចុងឆ្នាំទៅមិញ ដោយប្រទេសនេះបានហាមឃាត់ការធ្វើដំណើរចូលរបស់ជនបរទេស រួមទាំងសិស្ស និស្សិត និងសមាជិកគ្រួសារដែលពុំមែនជាជនជាតិជប៉ុន និងអ្នករស់នៅអចិន្ត្រៃយ៍ លើកលែងតែក្នុងកាលៈទេសៈពិសេស។
លោក Kishida បានប្រាប់អ្នកយកព័ត៌មានថា៖ “ដោយសារតែច្បាប់ព្រំដែនដ៏តឹងរ៉ឹងបំផុតនៅក្នុងក្រុមប្រទេសG7 យើងអាចគ្រប់គ្រងការរីករាលដាលនៃវ៉ារ្យ៉ង់អូមីក្រុងឱ្យនៅកម្រិតតិចតួចបំផុត ដោយផ្តល់ឱ្យយើងនូវពេលវេលាដើម្បីរៀបចំខ្លួន និងដោះស្រាយជាមួយនឹងការឆ្លងមេរោគក្នុងស្រុក”។
លោកបានបន្ដថា៖ “យើងនឹងរក្សាវិធានការបច្ចុប្បន្នរហូតដល់ចុងខែកុម្ភៈ … ខណៈពេលដែលកំពុងចាត់វិធានការចាំបាច់ដោយគិតគូរពីផ្នែកមនុស្សធម៌ និងផលប្រយោជន៍ជាតិ”។
ក្រោមការកំណត់របស់ច្បាប់ អ្នកធ្វើដំណើរចូលប្រទេស ដែលភាគច្រើនជាជនជាតិជប៉ុននិងអ្នកស្នាក់នៅអចិន្ត្រៃយ៍ ចាំបាច់ត្រូវនៅដាច់ដោយឡែកនៅសណ្ឋាគាររយៈពេល៦ថ្ងៃ ហើយបន្ដនៅដាច់ដោយឡែកនៅតាមផ្ទះ។
វិធានការនេះបានបង្កឱ្យមានការតវ៉ានិងការដាក់ញត្តិទាមទារឱ្យមានការបន្ធូរបន្ថយ។ ប្រព័ន្ធផ្សព្វផ្សាយបានរាយការណ៍កាលពីថ្ងៃអង្គារថារដ្ឋាភិបាលកំពុងពិចារណាបន្ធូរបន្ថយច្បាប់មួយចំនួននៅក្នុងករណីពិសេស។
លោកនាយករដ្ឋមន្ត្រី Kishida បានថ្លែងថា ខណៈពេលដែលយើងនៅមិនទាន់មានព័ត៌មាននិងទិន្នន័យទូលំទូលាយពីវ៉ារ្យ៉ង់អូមីក្រុង ហានិភ័យនៃការធ្លាក់ខ្លួនឈឺធ្ងន់ធ្ងរហាក់ដូចជាមានកម្រិតទាប។ លោកបានបញ្ជាក់ថា កុមារអាយុក្រោម ១២ ឆ្នាំអាចនឹងទទួលបានវ៉ាក់សាំងនៅពេលខាងមុខ៕
