កូរ៉េខាងជើងនិយាយថា ខ្លួនបានបាញ់សាកល្បងមីស៊ីលលឿនជាងសំឡេង (Hypersonic) មួយទៀត ក្រោមការឃ្លាំមើលរបស់មេដឹកនាំកំពូលលោក គីម ជុងអ៊ុន។ ទីភ្នាក់ងារសារព័ត៌មានរដ្ឋ KCNA បានរាយការណ៍ថា មីស៊ីលដែលបានសាកល្បងកាលពីថ្ងៃអង្គារបាន “បាញ់ចំគោលដៅយ៉ាងច្បាស់” ដែលមានចម្ងាយ ១,០០០ គីឡូម៉ែត្រ។
វាជាការបាញ់សាកល្បងមីស៊ីលលឿនជាងសំឡេងជាលើកទី៣របស់កូរ៉េខាងជើង ដែលអាចគេចផុតបានយូរពីប្រព័ន្ធស្ទាក់ចាប់មីស៊ីលផ្លោង។ ការសាកល្បងចំនួនពីរបានកើតឡើងក្នុងរយៈពេលមួយសប្តាហ៍ បន្ទាប់ពីលោក គីម ជុងអ៊ុន បានប្តេជ្ញានៅក្នុងសុន្ទរកថាឆ្នាំថ្មីក្នុងការពង្រឹងខឿនការពាររបស់ទីក្រុងព្យុងយ៉ាង។
ទាំងកូរ៉េខាងត្បូងនិងជប៉ុនចាប់បានការបាញ់បង្ហោះមីស៊ីល កាលពីថ្ងៃអង្គារ ដោយនិយាយថា មីស៊ីលមួយត្រូវបានបាញ់ចេញពីកូរ៉េខាងជើងឆ្ពោះទៅសមុទ្រ។
ក្រោយមក ទីភ្នាក់ងារសារព័ត៌មាន KCNA បាននិយាយថា វាគឺជាមីស៊ីលដែលមានល្បឿនលឿនជាងសំឡេង (Hypersonic) ដែលត្រូវបានពិពណ៌នាថា ជាមីស៊ីលដែលមានសមត្ថភាពបំលាស់ទីដ៏អស្ចារ្យ។
កូរ៉េខាងជើងធ្លាប់បាននិយាយថា ខ្លួនបានធ្វើតេស្តមីស៊ីលលឿនជាងសំឡេងដោយជោគជ័យនៅថ្ងៃទី៥ ខែមករា។ ទង្វើនេះបានទាក់ទាញការថ្កោលទោសពីបណ្តាប្រទេសរួមទាំងសហរដ្ឋអាមេរិក ចក្រភពអង់គ្លេស និងបារាំង ដែលបានជំរុញឱ្យទីក្រុងព្យុងយ៉ាងបញ្ឈប់ “សកម្មភាពអស្ថិរភាព” របស់ខ្លួន។
មីស៊ីល Hypersonic ជាធម្មតាហោះហើរឆ្ពោះទៅរកគោលដៅនៅរយៈកម្ពស់ទាបជាងមីស៊ីលផ្លោង ហើយអាចហោះបានក្នុងល្បឿនលឿនជាងសម្លេងប្រហែល៥ដងឬស្មើ ៦,២០០ គីឡូម៉ែត្រក្នុងមួយម៉ោង។
មកទល់ពេលនេះ ប្រទេសកូរ៉េខាងជើងស្ថិតក្នុងចំណោមប្រទេសមួយចំនួនតូច រួមទាំងសហរដ្ឋអាមេរិក និងចិន ដែលប៉ុនប៉ងអភិវឌ្ឍមីស៊ីលលឿនជាងសំឡេង (Hypersonic)៕
