ប្រធានាធិបតី៖ អ៊ុយក្រែនត្រៀមខ្លួនជាស្រេចក្នុងការសម្រេចចិត្តបញ្ចប់សង្គ្រាមនៅក្នុងកិច្ចប្រជុំកំពូលបួនភាគី

ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃអង្គារថា ប្រទេសអ៊ុយក្រែនបានត្រៀមខ្លួនជាស្រេចដើម្បីធ្វើការសម្រេចចិត្តចាំបាច់ក្នុងការបញ្ចប់សង្រ្គាមនៅក្នុងតំបន់ Donbass ភាគខាងកើតរបស់ខ្លួន នៅក្នុងកិច្ចប្រជុំកំពូលថ្មីរវាងមេដឹកនាំអ៊ុយក្រែន រុស្ស៊ី បារាំង និងអាល្លឺម៉ង់។

លោក Zelenskiy បានឱ្យដឹងតាមរយៈសេចក្តីថ្លែងការណ៍មួយថា៖ “វាដល់ពេលដែលត្រូវយល់ព្រមលើការបញ្ចប់ជម្លោះ ហើយយើងត្រៀមខ្លួនរួចជាស្រេចសម្រាប់ការសម្រេចចិត្តចាំបាច់ក្នុងអំឡុងពេលកិច្ចប្រជុំកំពូលថ្មីរវាងមេដឹកនាំនៃប្រទេសទាំងបួន”។

នៅក្នុងសេចក្តីថ្លែងការណ៍ដដែលនេះ លោក Andriy Yermak នាយខុទ្ទកាល័យរបស់លោកប្រធានាធិបតី បាននិយាយថា ទីក្រុងកៀវចង់យល់ព្រមលើវិធានការដូចជាការអនុវត្តបទឈប់បាញ់ និងការផ្លាស់ប្តូរអ្នកទោសបន្ថែមទៀត។
កិច្ចចរចារបួនភាគីគឺសំដៅជួយបញ្ចប់ជម្លោះនៅភាគខាងកើតអ៊ុយក្រែនរវាងកងកម្លាំងរដ្ឋាភិបាលអ៊ុយក្រែន និងក្រុមផ្តាច់ខ្លួនដែលគាំទ្ររុស្ស៊ី ប៉ុន្តែបានជាប់គាំងនៅក្នុងខែវិច្ឆិកា ដោយសារតែមានការខ្វែងគំនិតគ្នា។

ចាប់តាំងពីពេលនោះមក រុស្ស៊ីបានចល័តទ័ពជិត ១០ ម៉ឺននាក់ទៅជិតព្រំដែនរបស់ខ្លួនជាមួយអ៊ុយក្រែន។ រុស្ស៊ីបានអះអាងថា ខ្លួនមិនបានរៀបចំផែនការលុកលុយទេ ប៉ុន្តែចង់ឃើញលោកខាងលិចដកខ្លួនចេញពីការគាំទ្ររដ្ឋាភិបាលអ៊ុយក្រែន ហើយបានទាមទារឱ្យមានការធានាថា អង្គការណាតូ ដែលដឹកនាំដោយសហរដ្ឋអាមេរិក នឹងមិនពង្រីកទៅភាគខាងកើតបន្ថែមទៀតទេ៕