អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា ឯកឧត្តម យី វាសនា បានអញ្ជើញចុះមកកាន់ខេត្តបាត់ដំបង និងខេត្តសៀមរាប នៅថ្ងៃទី១០-១១ ខែមករា ឆ្នាំ២០២២ ដើម្បីស្វែងរកអត្តពលិកពិការ ប្រកបដែលមានសមត្ថភាពល្អ ៗ យកមកបណ្តុះបណ្តាលបន្ថែម ដើម្បីត្រៀមប្រកួតប្រជែងមេដាយជូនជាតិ ក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ឯកឧត្តមអគ្គលេខាធិការ មានប្រសាសន៍ថា យុទ្ធនាការតាមបណ្តាខេត្តនេះ គណៈកម្មាធិការជាតិប៉ារ៉ាឡាំពិកកម្ពុជា បានធ្វើចំនួន៣រួចហើយ ក្នុងនោះមាន ខេត្តកំពង់ស្ពឺ បាត់ដំបង និងខេត្តសៀមរាប។ ក្នុងគោលដៅជ្រើសរើសកីឡាករ កីឡាការិនីជនពិការ ដែលមានទេពកោសល្យ យកមកហ្វឹកហាត់ដុះខាត់កម្រិតសមត្ថភាពរបស់ជនមានពិការភាព ទៅតាមប្រភេទកីឡាជំនាញរបស់ពួកគេ ដើម្បីត្រៀមដណ្តើមមេដាយជូនជាតិ ក្នុងឋានៈកម្ពុជាកំពុងត្រៀមលក្ខណៈត្រៀមឆ្ពោះទៅទទួលរៀបចំការប្រកួតកីឡាជនពិការ អាស៊ានប៉ារ៉ាហ្គេមលើកទី១២ ឆ្នាំ២០២៣ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា បន្ទាប់ពីបញ្ចប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ប្រមាណ២សប្តាហ៍។
ឯកឧត្តម យី វាសនា បានអះអាងថា យុទ្ធនាការនេះនឹងបន្តទៅកាន់ខេត្តជាច្រើនទៀត ដើម្បីជ្រើសរើសឱ្យបានធនធានល្អៗលើប្រភេទកីឡាតាមជំនាញ ចំនួន២០០នាក់ រួមទាំងប្រតិភូគ្រូបង្វឹក មន្រ្តីបច្ចេកទេស អាជ្ញាកណ្តាល ចៅក្រម និងអ្នកស្ម័គ្រចិត្ត ប្រមាណជា៣០០នាក់ទៀត ដើម្បីត្រៀមគ្រប់ទម្រង់ ដោយត្រៀមចូលរួមហែក្បួនក្នុងពិធីបើកព្រឹត្តិការណ៍កីឡាអាស៊ានប៉ារ៉ាហ្គេម ២០២២ ក្រៅអំពីគោលដៅប្រកួតប្រជែងមេដាយ ក្នុងឋានៈជាម្ចាស់ផ្ទះ។
គួរបញ្ជាក់ថា បេសកកម្មរបស់ឯកឧត្តម យី វាសនា អគ្គលេខាធិការ គណៈលេខាធិការប៉ារ៉ាឡាំពិកកម្ពុជា រយៈពេលពីរថ្ងៃនេះមកកាន់ខេត្តបាត់ដំបង កាលពីថ្ងៃទី១០ ខែមករា និងបន្តមកសៀមរាបនេះ គឺឯកឧត្តម និងមន្ត្រីជំនាញនៃគណៈកម្មាធិការជាតិប៉ារ៉ាឡាំពិកកម្ពុជា លោក សុខ ជា និងលោកស្រី សុង សុខលាប ជ្រើសរើសបានអត្តពលិកកីឡាជនពិការ លើប្រភេទកីឡាបាល់បោះរទេះ ប៊ូល និងប៉េតង់ ប៊ូស្យា បាល់ទះអង្គុយ និងប្រភេទកីឡាជនពិការជាច្រើនទៀត៕
