អង្គការសហប្រជាជាតិនឹងត្រូវការប្រាក់ប្រហែល ៣.៩ ពាន់លានដុល្លារនៅឆ្នាំនេះ ដើម្បីជួយប្រជាជនរាប់លាននាក់នៅក្នុងប្រទេសយេម៉ែន ដែលរងការហែកហួរដោយសង្រ្គាម។ នេះបើយោងតាមប្រសាសន៍របស់មន្ត្រីកំពូលរបស់អង្គការសហប្រជាជាតិ។
ជំនួយការអគ្គលេខាធិការស្តីទីទទួលបន្ទុកកិច្ចការមនុស្សធម៌ និងអ្នកសម្របសម្រួលរងជំនួយសង្គ្រោះបន្ទាន់ លោក Ramesh Rajasingham បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធថា៖ “ឧបសគ្គដ៏ធំបំផុតនៅពេលនេះគឺការផ្តល់មូលនិធិ ដើម្បីជួយប្រជាជនប្រហែល ១៦ លាននាក់នៅក្នុងប្រទេសយេម៉ែន ជាកន្លែងដែលសង្រ្គាមស៊ីវិលបានផ្ទុះឡើងអស់រយៈពេលជាងប្រាំពីរឆ្នាំ”។
លោក Rajasingham បាននិយាយថា៖ “ខ្ញុំសូមអំពាវនាវឱ្យម្ចាស់ជំនួយទាំងអស់រក្សានិរន្តរភាព ហើយប្រសិនបើអាចធ្វើទៅបាន ពួកគេគួរបង្កើនការគាំទ្រនៅឆ្នាំនេះ”។
លោកបានបន្ថែមថា ការផ្តល់មូលនិធិបានថយចុះក្នុងប៉ុន្មានឆ្នាំថ្មីៗនេះ ដោយផែនការឆ្លើយតបកាលពីឆ្នាំមុនបានផ្តល់មូលនិធិត្រឹមតែ ៥៨ ភាគរយប៉ុណ្ណោះ ហើយជាមួយនឹងកម្មវិធីស្បៀងអាហារពិភពលោករបស់អង្គការសហប្រជាជាតិក្នុងខែធ្នូបានប្រកាសកាត់បន្ថយថវិកាជំនួយរបស់ខ្លួនសម្រាប់មនុស្សប្រាំបីលាននាក់។
លោក Rajasingham បានថ្លែងថា៖ “កម្មវិធីសំខាន់ៗផ្សេងទៀត រួមទាំងទឹកស្អាត ការការពារ និងសេវាសុខភាពបន្តពូជក៏ត្រូវបានបង្ខំឱ្យកាត់បន្ថយ ឬបិទក្នុងរយៈពេលប៉ុន្មានសប្តាហ៍ថ្មីៗនេះ ដោយសារកង្វះថវិកា”។ ក្រៅពីការផ្តល់មូលនិធិ ការទទួលជំនួយមនុស្សធម៌ និងបញ្ហាសន្តិសុខក៏នៅតែជាឧបសគ្គដ៏សំខាន់ក្នុងការផ្តល់ជំនួយ៕
