អត្ថបទ និង រូបភាព ទឹម រតនា
ភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញនៅថ្ងៃទី១២ ខែមករាឆ្នាំ២០២២ បានបើកសវនាការជំនុំជម្រះលើជនជាប់ចោទម្នាក់ឈ្មោះ សៅខូ ចន្ទ័សូឡារ ភេទប្រុស អាយុ ២២ឆ្នាំ ជនជាតិ ខ្មែរ ជាចោទពីបទ.កាន់កាប់អាវុធដោយគ្មានការអនុញ្ញាត ក្រោយពីសវនាការចប់សព្វគ្រប់ចៅក្រមសម្រេចកំណត់យកថ្ងៃទី២១ ខែមករាឆ្នាំ២០២២ វេលាម៉ោង៨ព្រឹកដើម្បីធ្វើការប្រកាសសាលក្រម។
សូមបញ្ជាក់ថា កម្លាំងសមត្ថកិច្ចបានឃាត់ខ្លួនជនសង្ស័យ ឈ្មោះ សៅខូ ចន្ទ័សូឡារ កាលពីថ្ងៃទី ២៤ ខែមិថុនា ឆ្នាំ ២០២១ នៅចំណុចស្ថានីយ៍ប្រេងឥន្ទនៈ LHR និងចំណុចផ្ទះលេខ១២០បេ ភូមិចំកាឱឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
វត្ថុតាងចាប់យក មាន អាវុធខ្លី ១ដើម ម៉ាកTACTICAL23 លេខ WET5168 និងបង់ចំនួន ២(កាំភ្លើងហ្គាស), គ្រាប់អាវុធប្រភេទ 9mm ចំនួន ១២គ្រាប់ ខ្នោះដៃ ចំនួន ១គូ វិទ្យុទាក់ទងម៉ាកម៉ូតូរ៉ូឡាចំនួន ១គ្រឿង ស្រោមអាវុធខ្លី ចំនួន ៤ស្រោម កាតនគរបាលជាតិក្លែងក្លាយចំនួន ២សន្លឹក ស័ក្តិថ្នាក់វរសេនីយ៍ទោ ១គូ កាតនគរបាលព្រហ្មទណ្ឌក្លែងក្លាយ ចំនួន ២សន្លឹក មួកនគរបាលជាតិថ្នាក់វរសេនីយ៍ចំនួន ២ និងថ្នាក់អនុសេនីយ៍ ១ ឯកសណ្ឋាននគរបាលជាតិចំនួន ៦កំប្លេ ឯកសារក្លែងក្លាយ មានលិខិតបទដ្ឋានរបស់ក្រសួងមហាផ្ទៃ. របស់នាយកដ្ឋានកណ្ដាលនគរបាលយុត្តិធម៌ និងរបស់នាយកដ្ឋានព្រហ្មទណ្ឌ មួយចំនួនធំ ប្រអប់ដាក់អាវុធខ្លីម៉ាក CZ ចំនួន១ ម៉ាស៊ីនកាត់កាត ចំនួន ១គ្រឿង អាវក្រោះការពារគ្រាប់ចំនួន ១អាវ អាវកាក់ពាក់ពីលើឯកសណ្ឋាននគរបាលជាតិចំនួន១ កាបូបដាក់សម្ភារៈចំនួន ៣ស្បែកជើងកវែងចំនួន ១គូ ៕
