បណ្ដាប្រទេសក្រីក្របដិសេដមិនប្រើវ៉ាក់សាំងជាង១០០លានដូស ដោយសារជិតផុតកំណត់

មន្ត្រីអង្គការយូនីសេហ្វបាននិយាយកាលពីថ្ងៃព្រហស្បតិ៍ថា បណ្ដាប្រទេសក្រីក្រ កាលពីខែមុន មិនបានប្រើប្រាស់វ៉ាក់សាំងកូវីដ-១៩ច្រើនជាង ១០០ លានដូស ដែលចែកចាយក្រោមយន្ដការ COVAX ដោយសារតែកាលបរិច្ឆេទផុតកំណត់កៀកពេក។

តួលេខដ៏ធំនេះបានបង្ហាញពីការលំបាកក្នុងការចាក់វ៉ាក់សាំងនៅលើពិភពលោក បើទោះបីជាការផ្គត់ផ្គង់វ៉ាក់សាំងបានកើនឡើងក្តី។ យន្ដការ COVAX បានចែកចាយជិត ១ ពាន់លានដូសទៅកាន់ប្រទេសនានាសរុបជាង ១៥០ ប្រទេស។
លោកស្រី Etleva Kadilli នាយកផ្នែកផ្គត់ផ្គង់ប្រចាំអង្គការ UNICEF បានប្រាប់សមាជិកសភានៅសភាអឺរ៉ុបថា៖ “ច្រើនជាង ១០០ លាននដូសត្រូវបានបដិសេធនៅក្នុងខែធ្នូ”។ លោកស្រីបាននិយាយថា មូលហេតុចម្បងនៃការបដិសេធគឺដោយសារតែវ៉ាក់សាំងមានអាយុកាលប្រើប្រាស់ខ្លី។

លោកស្រី Kadilli បានបន្ដថា ប្រទេសក្រីក្រក៏ត្រូវបានបង្ខំឱ្យពន្យារពេលការផ្គត់ផ្គង់ផងដែរ ដោយសារតែពួកគេមានកន្លែងស្តុកទុកមិនគ្រប់គ្រាន់ រួមទាំងកង្វះទូរទឹកកកសម្រាប់រក្សាវ៉ាក់សាំងផងដែរ។
ប្រទេសជាច្រើនក៏មានការស្ទាក់ស្ទើរក្នុងការទទួលវ៉ាក់សាំងក្នុងបរិមាណច្រើនផងដែរ ហើយមានប្រព័ន្ធថែទាំសុខភាពក៏កំពុងស្ថិតក្រោមសម្ពាធយ៉ាងខ្លាំង។អង្គការ UNICEF មិនបានឆ្លើយតបភ្លាមៗ ចំពោះសំណួរជុំវិញចំនួនវ៉ាក់សាំងសរុបដែលត្រូវបានបដិសេដរហូតមកដល់ពេលនេះ។

ទិន្នន័យរបស់អង្គការ UNICEF ស្តីពីការផ្គត់ផ្គង់និងការប្រើប្រាស់វ៉ាក់សាំងដែលបានចែកចាយ បានបង្ហាញថា វ៉ាក់សាំង ៦៨១ លានដូសដែលត្រូវបានដឹកជញ្ជូនបច្ចុប្បន្នត្រូវបានរក្សាទុកនៅក្នុងប្រទេសក្រីក្រប្រហែល ៩០ ប្រទេស។ នេះបើយោងតាមអង្គការ CARE ដែលជាអង្គការសប្បុរសធម៌ ដែលបានស្រង់តួលេខពីមូលដ្ឋានទិន្នន័យសាធារណៈ។
អង្គការ CARE បានបញ្ជាក់ថា ប្រទេសក្រីក្រជាង ៣០ រួមទាំងរដ្ឋធំៗដូចជាសាធារណៈរដ្ឋប្រជាធិបតេយ្យកុងហ្គោ និងនីហ្សេរីយ៉ា បានប្រើប្រាស់តិចជាងពាក់កណ្តាលនៃកម្រិតថ្នាំ ដែលពួកគេបានទទួល៕