និយតករការប្រកួតប្រជែងរបស់ប្រទេសអូស្ត្រាលីកាលពីថ្ងៃចន្ទបាននិយាយថា ខ្លួនមានក្តីបារម្ភយ៉ាងខ្លាំងអំពីរបាយការណ៍នៃការឡើងថ្លៃឧបករណ៍ធ្វើតេស្តរហ័សរកអង់ទីហ្សែនមេរោគកូវីដ-១៩ និងស្វែងរកព័ត៌មានពីអ្នកផ្គត់ផ្គង់ អ្នកលក់រាយ និងសង្វាក់ឱសថស្ថានអំពីការកើនឡើងថ្លៃនេះ។
ប្រទេសអូស្ត្រាលីកំពុងប្រឈមនឹងការខ្វះខាតឧបករណ៍ធ្វើតេស្តអង់ទីហ្សែនរហ័ស បន្ទាប់ពីអាជ្ញាធរបានជំរុញឱ្យអ្នកប៉ះពាល់ដោយផ្ទាល់និងប្រយោលជាមួយអ្នកជំងឺកូវីដ-១៩គ្មានរោគសញ្ញា ពុំចាំបាច់ចូលមន្ទីរពិសោធន៍យកសំណាកឡើយ ដោយសារតែលទ្ធផលជាច្រើនត្រូវបានពន្យារពេល ប៉ុន្ដែពួកគេត្រូវធ្វើតេស្ដដោយខ្លួនឯង។
លោក Rod Sims ប្រធានគណៈកម្មការប្រកួតប្រជែងនិងអ្នកប្រើប្រាស់អូស្ត្រាលី (ACCC) ) បាននិយាយថា៖ “នៅចំចំណុចកណ្តាលនៃការផ្ទុះឡើងដ៏ខ្លាំងនៃមេរោគកូវីដ-១៩ ការកំណត់តម្លៃលើសកម្រិតនៃឧបករណ៍ធ្វើតេស្តរហ័សរកអង់ទីហ្សែន ដែលត្រូវការដើម្បីវិនិច្ឆ័យជំងឺនិងការពារសាធារណជន គឺជាការព្រួយបារម្ភយ៉ាងខ្លាំង”។
លោក Sims បានបន្ដថា មានរបាយការណ៍អំពីឧបករណ៍ធ្វើតេស្ដរហ័សដាក់លក់រាយតាមអ៊ីនធឺណិត ដែលមានតម្លៃរហូតដល់ ៥០០ ដុល្លារអូស្ត្រាលី (៣៦១ ដុល្លារ) និងនៅតាមហាង មានតម្លៃ ៧០ ដុល្លារអូស្ដ្រាលី។ កាលពីប៉ុន្មានសប្ដាហ៍កន្លងទៅ ឧបករណ៍ធ្វើតេស្ដរហ័សដែលដាក់លក់នៅតាមឱសថស្ថាន មានតម្លៃត្រឹមតែ ១០ ដុល្លារអូស្ដ្រាលីប៉ុណ្ណោះ។
លោក Sims បានបញ្ជាក់ក្នុងសេចក្តីថ្លែងការណ៍មួយថា៖ “នេះគឺមិនអាចទទួលយកបានឡើយ”។
បន្ទាប់ពីទទួលបានជោគជ័យក្នុងការទប់ស្កាត់រលកឆ្លងមុនៗ អូស្ត្រាលីបានរាយការណ៍ថា ខ្លួនបានរកឃើញអ្នកឆ្លងថ្មីជិត ១.៣ លានករណីក្នុងរយៈពេលពីរសប្តាហ៍ចុងក្រោយនេះ ដែលបានជំរុញឱ្យមន្ទីរពេទ្យនិងគ្លីនិកធ្វើតេស្តនានាស្តុកទុកឧបករណ៍ធ្វើតេស្តរហ័សយ៉ាងច្រើនលើសលប់៕
