យោធាកូរ៉េខាងត្បូងបាននិយាយថា កូរ៉េខាងជើងទំនងជាបានបាញ់មីស៊ីលផ្លោងរយៈចម្ងាយខ្លីចំនួនពីរចូលទៅក្នុងសមុទ្រនៅក្នុងការសាកល្បងអាវុធលើកទីបួនរបស់ខ្លួនក្នុងខែនេះ ខណៈដែលទីក្រុងព្យុងយ៉ាងនៅតែបន្តការបាញ់សាកល្បងមីស៊ីល ដែលបង្កឱ្យមានការថ្កោលទោសនៅអង្គការសហប្រជាជាតិ។
អគ្គសេនាធិការចម្រុះរបស់កូរ៉េខាងត្បូងបាននិយាយកាលពីថ្ងៃចន្ទថា កូរ៉េខាងជើងសង្ស័យថាបានបាញ់មីស៊ីលផ្លោងពីរគ្រាប់ចេញពីអាកាសយានដ្ឋាន Sunan ក្នុងរដ្ឋធានីព្យុងយ៉ាង ប៉ុន្តែមិនបានបញ្ជាក់ភ្លាមៗថា តើមីស៊ីលហោះបានរយៈចម្ងាយប៉ុន្មាននោះទេ។
រដ្ឋាភិបាលជប៉ុនក៏បានរាយការណ៍ពីការបាញ់មីស៊ីលនេះផងដែរ ដោយថ្កោលទោសសកម្មភាពនេះថាជាការគំរាមកំហែងដល់សន្តិភាពនិងសន្តិសុខក្នុងតំបន់។
លោកនាយករដ្ឋមន្ត្រីជប៉ុន Fumio Kishida បានណែនាំរដ្ឋាភិបាលរបស់លោកឱ្យប្រឹងប្រែងអស់ពីសមត្ថភាពដើម្បីប្រមូលព័ត៌មានអំពីការបាញ់បង្ហោះ និងធានាសុវត្ថិភាពនៃនាវា និងយន្តហោះ។
ឆ្មាំសមុទ្ររបស់ប្រទេសជប៉ុនបានចេញការព្រមានសម្រាប់នាវាដែលធ្វើដំណើរជុំវិញដែនទឹករបស់ប្រទេសជប៉ុនឱ្យប្រុងប្រយ័ត្នចំពោះវត្ថុដែលធ្លាក់ ប៉ុន្តែមិនមានរបាយការណ៍ការខូចខាតភ្លាមៗនោះឡើយ។ ប៉ុន្មានម៉ោងបន្ទាប់ ឆ្មាំសមុទ្រក៏បានបញ្ជាក់ថា មីស៊ីលរបស់កូរ៉េខាងជើងបានធ្លាក់ចុះពីអាកាសរួចហើយ ប៉ុន្តែមិនបានបញ្ជាក់ពីទីកន្លែងនោះទេ។
កូរ៉េខាងជើងបានបាញ់សាកល្បងមីស៊ីលជាបន្តបន្ទាប់ចាប់តាំងពីដើមឆ្នាំមក។ កាលពីសប្តាហ៍មុន ប្រទេសនេះបានបាញ់សាកល្បងមីស៊ីលដែលមានល្បឿនលឿនជាងសំឡេង (Hypersonic) ដែលបានសង្កេតមើលដោយផ្ទាល់ដោយមេដឹកនាំ លោក គីម ជុងអ៊ុន។
គួរបញ្ជាក់ផងដែរថា ទីក្រុងព្យុងយ៉ាងត្រូវបានហាមឃាត់មិនឱ្យធ្វើតេស្តមីស៊ីលផ្លោងដោយអង្គការសហប្រជាជាតិ ហើយកិច្ចពិភាក្សាស្តីពីការរំសាយអាវុធនុយក្លេអ៊ែរត្រូវបានជាប់គាំងចាប់តាំងពីឆ្នាំ២០១៩ នៅពេលដែលកិច្ចប្រជុំកំពូលរវាងអតីតប្រធានាធិបតីសហរដ្ឋអាមេរិក លោក ដូណាល់ ត្រាំ និងលោក គីម ជុងអ៊ុន បានដួលរលំ ដោយសារតែមានការទាមទារពីកូរ៉េខាងជើងក្នុងការបន្ធូរបន្ថយទណ្ឌកម្ម៕
