អត្រាកំណើតរបស់ចិនធ្លាក់ចុះដល់កម្រិតទាបបំផុតក្នុងឆ្នាំ២០២១

ទិន្នន័យរបស់ការិយាល័យស្ថិតិជាតិបានបង្ហាញកាលពីថ្ងៃចន្ទថា អត្រាកំណើតរបស់ចិនដីគោកបានធ្លាក់ចុះដល់កម្រិតទាបបំផុតដែលស្មើនឹង ៧.៥២ ក្នុងចំណោមមនុស្ស ១,០០០ នាក់ក្នុងឆ្នាំ២០២១ បើទោះបីកាលពីឆ្នាំមុន ទីក្រុងប៉េកាំងបានចាប់ផ្តើមអនុញ្ញាតឱ្យគូស្វាមីភរិយាមានកូនរហូតដល់ទៅ ៣ នាក់ក្ដី។
ប្រទេសចិនបានលុបចោលគោលនយោបាយចាស់វស្សារបស់ខ្លួន ដែលបានអនុញ្ញាតឱ្យមួយគ្រួសារមានកូនតែមួយកាលពីឆ្នាំ២០១៦ និងបានជំនួសមកវិញនូវការអនុញ្ញាតឱ្យមានកូនពីរនាក់ ដើម្បីព្យាយាមបញ្ចៀសហានិភ័យសេដ្ឋកិច្ច ដែលអាចកើតមានដោយសារតែការកើនឡើងនៃប្រជាជនវ័យចំណាស់ ប៉ុន្ដែការរស់នៅក្នុងទីក្រុង ដែលត្រូវការការចំណាយខ្ពស់ បានរារាំងគ្រួសារពីការមានកូនច្រើន។

អត្រាកំណើតគឺស្ថិតក្នុងកម្រិតទាបបំផុតចាប់តាំងពីឆ្នាំ១៩៤៩ នៅពេលដែលការិយាល័យស្ថិតិបានចាប់ផ្តើមប្រមូលទិន្នន័យ។ យោងតាមទិន្នន័យ អត្រាកំណើនធម្មជាតិនៃចំនួនប្រជាជនរបស់ប្រទេសចិន ដែលមិនរាប់បញ្ចូលជនធ្វើចំណាកស្រុក គឺមានត្រឹមតែ ០.០៣៤% សម្រាប់ឆ្នាំ២០២១ ដែលជាកម្រិតទាបបំផុតចាប់តាំងពីឆ្នាំ១៩៦០មក។

លោក Zhiwei Zhang ប្រធានសេដ្ឋវិទូនៅក្រុមហ៊ុន Pinpoint Asset Management បាននិយាយថា៖ “បញ្ហាប្រឈមក្នុងផ្នែកប្រជាសាស្រ្តត្រូវបានគេស្គាល់យ៉ាងច្បាស់ ប៉ុន្តែល្បឿននៃប្រជាជនវ័យចំណាស់គឺពិតជាលឿនជាងការរំពឹងទុក”។
លោក Zhang បានបន្ដថា៖ “នេះបង្ហាញថាចំនួនប្រជាជនសរុបរបស់ប្រទេសចិនអាចនឹងឈានដល់កម្រិតកំពូលនៅឆ្នាំ២០២១។ វាក៏បង្ហាញផងដែរថា កំណើនសក្តានុពលរបស់ប្រទេសចិនទំនងជានឹងយឺតជាងការរំពឹងទុក”។
ទិន្នន័យបានបង្ហាញថា ក្នុងឆ្នាំ២០២១ ទារកដែលបានចាប់កំណើតមានចំនួន ១០.៦២ លាននាក់ បើធៀបនឹងឆ្នាំ២០២០ មាន ១២ លាននាក់។ អត្រាកំណើតនៅឆ្នាំ២០២០ គឺស្មើ ៨.៥២ ក្នុងចំណោមមនុស្ស ១,០០០ នាក់៕