ការស្ទង់មតិបង្ហាញថា ប្រជាប្រិយភាពលោកនាយករដ្ឋមន្ត្រីអូស្ត្រាលីធ្លាក់ចុះ

ប្រជាប្រិយភាពរបស់លោក Scott Morrison នាយករដ្ឋមន្ត្រីអូស្ត្រាលីបានធ្លាក់ចុះ ដោយសារតែការដោះស្រាយការរីករាលដាលនៃមេរោគកូវីដ-១៩បំប្លែងខ្លួនថ្មីប្រភេទអូមីក្រុងនៅក្នុងប្រទេស ដែលបានជំរុញឱ្យបក្សប្រឆាំងនាំមុខ ខណៈការបោះឆ្នោតនឹងចូលមកដល់ក្នុងរយៈពេលប៉ុន្មានខែខាងមុខនេះ។ នេះបើយោងតាមការស្ទង់មតិ ដែលបានចេញផ្សាយនៅថ្ងៃអង្គារ។

យោងតាមការស្ទង់មតិដែលធ្វើឡើងដោយក្រុមហ៊ុនស្រាវជ្រាវ Resolve Strategic សម្រាប់កាសែត Sydney Morning Herald អ្នកបោះឆ្នោតអូស្ត្រាលីកំពុងបាត់បង់ទំនុកចិត្តលើលោក Morrison និងរដ្ឋាភិបាលចម្រុះរបស់គណបក្ស Liberal-National Party របស់លោកលើកិច្ចការក្នុងផ្នែកសេដ្ឋកិច្ច ការងារ សុខភាព និងការឆ្លើយតបទៅនឹងរលកឆ្លងអូមីក្រុង ដែលមានចលនាលឿន។

ការស្ទង់មតិលើអ្នកបោះឆ្នោតចំនួន ១,៦០៧ នាក់ត្រូវបានធ្វើឡើងពីថ្ងៃទី១១ ដល់ថ្ងៃទី១៥ ខែមករា មុនពេលតុលាការអូស្ត្រាលីបានតម្កល់ការសម្រេចចិត្តរបស់រដ្ឋាភិបាលក្នុងការលុបចោលទិដ្ឋាការរបស់កីឡាករ Novak Djokovic ដែលមិនបានចាក់វ៉ាក់សាំងមុនការប្រកួត Australian Open ។

ការលើកលែងផ្នែកវេជ្ជសាស្រ្ដ ដែលបានអនុញ្ញាតឱ្យកីឡាករស៊ែប៊ីលំដាប់ពិភពលោកចូលក្នុងប្រទេសដោយមិនបានចាក់វ៉ាក់សាំងប្រឆាំងនឹងមេរោគកូវីដ-១៩ បានបង្កឱ្យមានកំហឹងនៅក្នុងប្រទេសអូស្ត្រាលី ហើយបានក្លាយជាបញ្ហានយោបាយសម្រាប់លោក Morrison ។

លោក Morrison តែងតែនាំមុខខ្ពស់ជាងគូប្រជែងរបស់លោកគឺ លោក Anthony Albanese ប៉ុន្តែបានបាត់បង់ការគាំទ្រប្រហែលពីរខ្ទង់កាលពីពីរខែមុន។ ប្រហែល ៣៨% នៃអ្នកបោះឆ្នោតចង់បានលោក Morrison ជាមេដឹកនាំរបស់ប្រទេស ខណៈដែល ៣១% ផ្សេងទៀតគាំទ្រលោក Albanese៕