អត្ថបទ និង រូបភាព ទឹម រតនា
ភ្នំពេញ៖ មន្ទីរពេទ្យកុមារជាតិមិត្តកម្ពុជានិងជប៉ុន ដែលបម្រើលើវិស័យសុខមាលភាព ព្យាបាលដល់បុត្រាបុត្រីរបស់បងប្អូនប្រជាពលរដ្ឋទូទាំងប្រទេស ដែលមកទទួលសេវាកម្មផ្សេងៗដូចជា ការពិនិត្យពិគ្រោះយល់អំពីជំងឺទូទៅ ផ្តល់សេវាថែទាំសុខភាព ចាក់វ៉ាក់សាំងបង្ការជំងឺ និង សេវាកម្មផ្សេងៗទៀត មន្ទីរពេទ្យកុមារជាតិស្តិតនៅក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ ។
មកដល់ចុងខែមករា ឆ្នាំ២០២២នេះ ជុំវិញមន្ទីរពេទ្យកុមារជាតិ ចិញ្ចើមផ្លូវ៣ខ្សែ ត្រូវបានអាជីវករបង្កើតតូបលក់ដូរ និងការចតម៉ូតូរថយន្ត ចំណុចជ្រុងខាងកើត គឺចិញ្ចើមផ្លូវ២៥៣ ចាប់ពីផ្លូវសហព័ន្ធរុស្ស៉ីមានរថយន្តអតិថិជនក្លឹបហាត់ប្រាណនិងកន្លែងលាងរថយន្តចតបំផ្លាញកាឡា បន្ទាប់មកដល់ច្រកចូលខាងកើតមានតូបលក់ដូរជាច្រើននៅលើចិញ្ចើមផ្លូវតែម្តង ។
ដោយឡែកចំណុចជ្រុងខាងត្បូងមន្ទីរពេទ្យកុមារជាតិ គឺចិញ្ចើមផ្លូវ១១៨ មានតូបនិងចតរថយន្តនិងរោងលក់ដូរ ចំណុចខាងលិចជាកន្លែងចរាចរបត់ចុះឡើងផ្លូវសហ័ពន្ធរុស្ស៉ី ឧស្សាហ៍បង្កការកកស្ទះ ដោយខាងក្រុមហ៊ុនធានារ៉ាប់រងឯកជន បានយកចិញ្ចើមផ្លូវរបងមន្ទីរពេទ្យ អស់ពាក់កណ្តាល គឺនៅលើផ្លូវ២៥៧ ធ្វើជាចំណតម៉ូតូ ដោយហេតុផលផ្តល់ថវិកាជូនមន្ទីរពេទ្យថែទាំនិងជួសជុលរបងមន្ទីរពេទ្យ ។
លោក ប៊ិច សុខឃឿន ចៅសង្កាត់ទឹកល្អក់១ បានប្រាប់អ្នកសារព័ត៌មានថា បញ្ហាដែលក្រុមហ៊ុនធានារ៉ាប់រងយកចិញ្ចើមផ្លូវ២៥៧ ធ្វើជាចំណតម៉ូតូ បានផ្តល់ប្រាក់ឧបត្ថម្ភមួយចំនួនក្នុង១ឆ្នាំទៅមន្ទីរកុមារជាតិ ថែទាំនិងជួសជុលរបង ដូចហេតុផលខាងក្រុមហ៊ុនបានលើកឡើងពិតប្រាកដមែន ក៏ប៉ុន្តែមិនបានបញ្ជាក់ចំនួនទឹកប្រាក់ និង ការធ្វើលិខិតបទដ្ឋានគតិយុត្តិអ្វីឡើយ ។
ចំពោះបញ្ហាសណ្តាប់ធ្នាប់ជុំវិញមន្ទីរពេទ្យកុមារជាតិ អាជ្ញាធរសង្កាត់ ដូចមិនសូវគិតអំពីផលប៉ះពាល់ ការធ្វើដំណើរប្រចាំថ្ងៃ ការកកស្ទះ ចង្អៀត អាចបង្កគ្រោះថ្នាក់ជាយថាហេតុ ។
មហាជនដែលធ្លាប់ឆ្លងការទើបយល់អារម្មណ៍មួយនេះ និង ស្នើដល់ឯកឧត្តម ជា ពិសី អភិបាលខណ្ឌទួលគោក រៀបចំសណ្តាប់ធ្នាប់ក្នុងមូលដ្ឋានឱ្យបានល្អប្រពៃផង ជាពិសេសជុំវិញមន្ទីរពេទ្យកុមារជាតិ មិនដែលឃើញចុះរៀបចំសោះ សង្ស័យជាឆ្នាំងបាយទេមើលទៅ? សូមកុំឱ្យមហាជនយល់ច្រឡំចំពោះមន្ត្រីអាជ្ញាធរពីភាពអសកម្មតូចៗទាំងនេះទាន ៕
