អន្តរជាតិ៖អ្នកការទូតកំពូលរបស់អាល្លឺម៉ង់និងរុស្ស៊ីបានជួបពិភាក្សាគ្នាអំពីភាពតានតឹងផ្នែកយោធាជុំវិញវិបត្តិនៅអ៊ុយក្រែន ប៉ុន្តែនៅតែមានទស្សនៈផ្ទុយគ្នាអំពីរបៀបកាត់បន្ថយហានិភ័យ។
រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock បានជួបជាមួយសមភាគីរុស្ស៊ីគឺលោក Sergey Lavrov នៅទីក្រុងមូស្គូកាលពីថ្ងៃអង្គារ។ នេះដំណើរទស្សនកិច្ចលើកដំបូងរបស់លោកស្រីទៅកាន់រដ្ឋធានីរុស្ស៊ីចាប់តាំងពីលោកស្រីចូលកាន់តំណែងបន្ទាប់ពីទស្សនកិច្ចនៅអ៊ុយក្រែន។
នៅក្នុងសន្និសីទសារព័ត៌មានរួមមួយបន្ទាប់ពីកិច្ចប្រជុំនោះ លោកស្រី Baerbock បាននិយាយថា វាពិតជាលំបាកណាស់ក្នុងការវាយតម្លៃការដាក់ពង្រាយទាហានជាង១សែននាក់ របស់រុស្ស៊ីនៅជិតព្រំដែនអ៊ុយក្រែនថាជា “ការគំរាមកំហែង” ដោយជំរុញឱ្យទីក្រុងម៉ូស្គូបន្ធូរបន្ថយភាពតានតឹង។
លោក Lavrov បាននិយាយថា រុស្ស៊ីមិនអាចទទួលយកបានទេ ដែលប្រទេសណាមួយជ្រៀតជ្រែកក្នុងចលនាយោធារុស្ស៊ីនៅក្នុងប្រទេសរបស់ខ្លួន។
លោកបាននិយាយថា រុស្ស៊ីកំពុងរង់ចាំការឆ្លើយតបទៅនឹងការទាមទាររបស់ខ្លួនសម្រាប់ការធានាថាNATO នឹងមិនពង្រីកខ្លួនបន្ថែមទៀតដើម្បីបន្តកិច្ចពិភាក្សា។មិនតែប៉ុណ្ណោះ លោកបានជំរុញឱ្យសហរដ្ឋអាមេរិក និងប្រទេសដទៃទៀតឆ្លើយតបដោយបង្ហាញសកម្មភាពជាក់ស្តែង ។
រដ្ឋមន្ត្រីការបរទេសរុស្ស៊ីរូបនេះក៏បានលើកឡើងអំពីបំពង់បង្ហូរឧស្ម័ន Nord Stream 2 ដែលនឹងបង្ហូរឧស្ម័នធម្មជាតិពីរុស្ស៊ីទៅកាន់ប្រទេសអាល្លឺម៉ង់។គម្រោងខាងលើកំពុងរង់ចាំការយល់ព្រមពីអឺរ៉ុប ដើម្បីចាប់ផ្តើមដំណើរការប៉ុន្តែមានការអំពាវនាវពីសហរដ្ឋអាមេរិក និងកន្លែងផ្សេងទៀតដើម្បីបញ្ឈប់គម្រោងនេះ។
ក្នុងជំនួបដ៏កម្រនេះដែរលោក Lavrov បានប្រាប់លោកស្រី Baerbock ថាវាគ្មានផលិតភាពក្នុងការធ្វើនយោបាយលើបញ្ហានេះ ដោយជំរុញឱ្យប្រទេសអាល្លឺម៉ង់យល់ព្រមភ្លាមៗនូវប្រតិបត្តិការបំពង់បង្ហូរប្រេងដ៏សំខាន់នេះ៕
