អន្តរជាតិ៖អង្គការសុខភាពពិភពលោកWHOបានផ្តល់ជាអនុសាសន៍ថា នៅពេលនេះពិភពលោកមិនចាំបាច់បង្កើតវ៉ាក់សាំងថ្មី ដើម្បីដោះស្រាយជាមួយនឹងមេរោគកូវីដ-១៩បំប្លែងខ្លួនទម្រង់អូមីក្រុងនោះទេ។នាយកប្រតិបត្តិនៃកម្មវិធីសង្គ្រោះសុខភាពរបស់អង្គការWHO លោក Michael Ryan បានអត្ថាធិប្បាយលើវ៉ាក់សាំង COVID-19 នៅក្នុងសន្និសីទសារព័ត៌មានមួយកាលពីថ្ងៃអង្គារ។
លោក Ryan បាននិយាយថាវ៉ាក់សាំងដើមជាច្រើននៅតែ “មានប្រសិទ្ធភាពប្រឆាំងនឹងវ៉ារ្យ៉ង់អូមីក្រុងពីការចូលមន្ទីរពេទ្យនិងការស្លាប់”។លោកបាននិយាយថាអង្គការWHO មិនមានចេតនាភ្លាមៗក្នុងការផ្តល់អនុសាសន៍និងផ្លាស់ប្តូរសមាសភាពនៃវ៉ាក់សាំងនោះទេ។
ប្រធានទីប្រឹក្សាវេជ្ជសាស្ត្រសេតវិមានលោកវេជ្ជបណ្ឌិត Anthony Fauci បាននិយាយកាលពីខែធ្នូថាប្រសិទ្ធភាពនៃវ៉ាក់សាំង Pfizer ឬ Moderna ចំនួនពីរដូសក្នុងការការពារការឆ្លងមេរោគ និងជំងឺធ្ងន់ធ្ងរដោយអូមីក្រុងគឺ”ទាបគួរឱ្យកត់សម្គាល់” ។
ប៉ុន្តែលោកបាននិយាយថាការសិក្សាបឋមបង្ហាញថា ដូសទីបីបង្កើនអង់ទីគ័រយ៉ាងខ្លាំងប្រឆាំងនឹងវ៉ារ្យ៉ង់នេះ។នាពេលកន្លងទៅក្រុមហ៊ុនផលិតវ៉ាក់សាំងPfizer និង Moderna បានប្រកាសថាពួកគេនឹងបង្កើតវ៉ាក់សាំងថ្មីដើម្បីឆ្លើយតបជាមួយវីរុសអូមីក្រុង។
តែយ៉ាងណាក៏ដោយជំហររបស់អង្គការសុខភាពពិភពលោកគឺថា ការចែកចាយវ៉ាក់សាំងជាសាកលប្រកបដោយយុត្តិធម៌នៃវ៉ាក់សាំងដែលមាននាពេលបច្ចុប្បន្ននេះទៅកាន់ប្រទេសកំពុងអភិវឌ្ឍន៍ និងប្រទេសដទៃទៀតនឹងជួយបញ្ចប់ជំងឺរាតត្បាត៕
