ក្រុមមេឃខៀវMan City នឹងងាកទៅចាប់យកខ្សែប្រយុទ្ធសញ្ជាតិប្រេស៊ីលកំពុងឡើងជើង Vinicius Junior របស់ក្រុមអធិរាជស Real Madrid ប្រសិនពួកគេ បរាជ័យក្នុងការព្យាយាមចុះហត្ថលេខានាំយកខ្សែប្រយុទ្ធវ័យក្មេង Erling Haalandពីក្លិប Dortmundនៅរដូវកាលនេះ។
ក្លិបដែលកំពុងនាំមុខគេនៅ Premier League បង្កើនការចាប់អារម្មណ៍ក្នុងការនាំយក Haaland ប៉ុន្តែក្រុមលោក Pep Guardiola ត្រូវបានមើលឃើញថាកំពុងតែតាមពីក្រោយគូប្រជែង Real Madrid។
Viniciusបានបង្ហាញទម្រង់លេងដ៏គួរឱ្យចាប់អារម្មណ៏នៅរដូវកាលនេះ ដោយរកបានគ្រាប់បាល់ ១៥ គ្រាប់និងបានបញ្ជូនបាល់ឱ្យមិត្តរួមក្រុមស៊ុត៩ លើកក្នុងការបង្ហាញខ្លួន២៧ដងគ្រប់ការប្រកួតទាំងអស់។ កីឡាករវ័យ ២១ ឆ្នាំរូបនេះនៅមានកុងត្រារយៈពេលពីរឆ្នាំកន្លះទៀតជាមួយក្រុមលោក Carlo Ancelotti ខណៈក្រុមកំពុងនាំមុខកំពូលតារាង La Ligaក៏កំពុងត្រៀមបន្តកិច្ចសន្យាថ្មីដល់រូបគេ។
ពេលនេះVinicius ត្រូវបានអ្នកស្នេហាវិស័យបាល់ទាត់យល់ថារូបគេកំពុងដើរតួនាទីសំខាន់ជំនួសតំណែង វីរបុរស Cristiano Ronaldo ក្រោយស៊ុតបញ្ចូលទីបានសរុប២៩ គ្រាប់ និង assists ៣២ លើកក្នុងការបង្ហាញខ្លួន ១៤៥ប្រកួតក្រោយ ផ្លាស់ពី Flamengo មកកាន់ទឹកដីSantiago Bernabeu ក្នុងឆ្នាំ ២០១៨៕
